തിരുവനന്തപുരം: തിരുവല്ലയിലെ മുൻസിപൽ സെക്രട്ടറിയുടെ കൈക്കൂലിക്കേസ് ഒതുക്കാനായി പ്രതിയിൽ നിന്ന് കൈക്കൂലി വാങ്ങിയ ഡിവൈഎസ്പി വിജിലൻസ് അന്വേഷണത്തിനിടെ മുങ്ങി. വിജിലൻസ് സ്പെഷ്യൽ സെൽ ഡിവൈ.എസ്.പി പി വേലായുധൻ നായരാണ് മുങ്ങിയത്.
വേലായുധൻ നായരുടെ വീട്ടിൽ വിജിലൻസ് സംഘം പരിശോധനയ്ക്ക് എത്തിയിരുന്നു ഇതിനിടെയാണ് ഇയാൾ സ്ഥലംവിട്ടത്. റെയ്ഡിഒൊടി രക്ഷപ്പെട്ടതെന്നാണ് അന്വേഷണത്തിനെത്തിയ ഉദ്യോഗസ്ഥർ പറയുന്നത്. തെളിവുകൾ ലഭിച്ചതിനാൽ അറസ്റ്റ് ഉണ്ടായേക്കുമെന്ന് ഭയന്ന് ഒളിവിൽ പോയെന്നാണ് നിഗമനം.
അനധികൃത സ്വത്ത് സമ്പാദനത്തെ തുടർന്ന് അന്വേഷണം നേരിട്ടിരുന്ന പ്രതിയായ തിരുവല്ല മുനിസിപ്പൽ സെക്രട്ടറി എസ് നാരായണനെ 25,000 രൂപ കൈക്കൂലി വാങ്ങുന്നതിനിടെ വിജിലൻസ് പിടികൂടിയിരുന്നു. പിന്നാലെ ഇയാളുമായി ഡിവൈഎസ്പി സാമ്പത്തിക ഇടപാട് നടത്തിയതായി തെളിവ് ലഭിച്ചിരുന്നു. ഇതിനെത്തുടർന്നാണ് വിജിലൻസ് കേസ് രജിസ്റ്റർ ചെയ്തത്.
തുടർന്നാണ് ഇയാളുടെ കഴക്കൂട്ടത്തെ വീട്ടിൽ പരിശോധനയ്ക്കായി സ്പെഷ്യൽ സെൽ യൂണിറ്റിലെ എസ്പിമാരുടെ നേതൃത്വത്തിലുള്ള സംഘം എത്തിയത്. റെയ്ഡിനോട് സഹകരിച്ച ഇയാൾ അവസാന ഘട്ടത്തിൽ എത്തിയപ്പോഴാണ് കടന്നുകളഞ്ഞത്. ബുധനാഴ്ച ഉച്ചയോടെ തുടങ്ങിയെ റെയ്ഡ് രാത്രി ഒൻപതോടെയാണ് അവസാനിച്ചത്.
റെയ്ഡിൽ ഇയാളുടെ പണമിടപാടുകൾ സംബന്ധിച്ച നിർണായക തെളിവുകൾ ലഭിച്ചിട്ടുണ്ടെന്നാണ് വിവരം. അതേസമയം, വ്യാഴാഴ്ച രാവിലെ വരെ വേലായുധൻ നായരെ കുറിച്ച് വിവരം ലഭിക്കാത്തതിനാൽ കുടുംബവും വിജിലൻസും കഴക്കൂട്ടം ഒോപാലീസിൽ ഇക്കാര്യം അറിയിച്ചിട്ടുണ്ട്.