കൊച്ചി: നടനും മുന്‍ ബിജെപി എംപിയുമായ സുരേഷ് ഗോപിയെ പിന്തുണച്ചതില്‍ തെറ്റുപറ്റിയെന്ന് എഴുത്തുകാരന്‍ എന്‍എസ് മാധവന്‍. അവിശ്വാസികളുടെ സര്‍വനാശത്തിനായി ശ്രീകോവിലിന്റെ മുന്നില്‍ പോയി പ്രാര്‍ഥിക്കുമെന്ന സുരേഷ്ഗോപിയുടെ പരാമര്‍ശത്തില്‍ പ്രതികരിച്ചിരിക്കുകയാണ് എന്‍എസ് മാധവന്‍.
ഇതിന് പിന്നലെയാണ് സുരേഷ് ഗോപിയെ അഭിനന്ദിച്ച് കൊണ്ട് മുമ്പ് പോസ്റ്റ് ചെയ്ത ട്വീറ്റ് റീട്വീറ്റ് ചെയ്ത് എന്‍എസ് മാധവന്‍ പ്രതികരിച്ചത്. ‘എന്റെ പിഴ,എന്റെ പിഴ,എന്റെ വലിയ പിഴ’ I cringe unconditionally ‘ എന്ന തലക്കെട്ടോടെയായിരുന്നു എന്‍എസ് മാധവന്‍ ട്വീറ്റ് ചെയ്തത്.
2021 മെയ് 29 നായിരുന്നു ആ ട്വീറ്റ് പോസ്റ്റ് ചെയ്തിരുന്നത്. ലക്ഷദ്വീപ് വിഷയത്തില്‍ പൃഥ്വിരാജിനെ പിന്തുണച്ചതിന് സുരേഷ്ഗോപിയെ അഭിനന്ദിച്ചായിരുന്നു മുമ്പ് അദ്ദേഹം ട്വീറ്റ് ചെയ്തത്.
‘സുരേഷ് ഗോപിയുടെ രാഷ്ട്രീയത്തിന് എതിരാണെങ്കിലും അദ്ദേഹത്തെ എനിക്ക് ഇഷ്ടമാണ്. മറ്റെല്ലാ കാര്യങ്ങളിലും അദ്ദേഹം മികച്ചയാളാണ്. അദ്ദേഹത്തിന്റെ മനുഷ്യത്വം തിളങ്ങി നില്‍ക്കുന്നു. അദ്ദേഹമല്ലാതെ മറ്റൊരു സൂപ്പര്‍ താരവും പൃഥ്വിരാജിന് പിന്തുണയുമായി എത്തിയില്ല അതും അദ്ദേഹത്തിന്റെ സ്വന്തം പാര്‍ട്ടിയായ ബിജെപി തന്നെ സൈബര്‍ ആക്രമണവുമായി രംഗത്തെത്തുന്ന സാഹചര്യത്തില്‍. അദ്ദേഹം അധികകാലം ആ വിഷമമായ അന്തരീക്ഷത്തില്‍ നിലനില്‍ക്കുമെന്ന് ഞാന്‍ കരുതുന്നില്ല’ എന്നായിരുന്നു അന്ന് എന്‍.എസ് മാധവന്‍ ട്വീറ്റ് ചെയ്തത്.
കഴിഞ്ഞദിവസം ആലുവ ശിവരാത്രി ആഘോഷവുമായി ബന്ധപ്പെട്ടായിരുന്നു സുരേഷ് ഗോപിയുടെ പരാമര്‍ശം. ‘ലോകത്തെ വിശ്വാസികളായ മനുഷ്യരെ ഞാന്‍ സ്നേഹിക്കും. എല്ലാ മതത്തിലെയും വിശ്വാസികളെ സ്നേഹിക്കും. അവിശ്വാസികളോട് ഒട്ടും സ്നേഹമില്ലെന്ന് ചങ്കൂറ്റത്തോടെ പറയും..’ വിശ്വാസികളുടെ അവകാശങ്ങളുടെ നേര്‍ക്കുവരുന്ന ഒരു ശക്തിയോടും പൊറുക്കില്ലെന്നായിരുന്നു സുരേഷ് ഗോപി പറഞ്ഞത്.
എന്റെ പിഴ എന്റെ പിഴ എന്റെ വലിയ പിഴ! 😬 I cringe unconditionally https://t.co/RDUeMFxHJ1
— N.S. Madhavan (@NSMlive) February 19, 2023