കൊല്ലം: ലോറി റോഡരികിൽ നിർത്തി രാത്രി വിശ്രമിക്കുകയായിരുന്ന ഡ്രൈവർ കുത്തേറ്റ് മരിച്ചു. കൊല്ലം കേരളപുരം അരുൺ വിഹാറിൽ അജയൻപിള്ള (61) ആണ് മരിച്ചത്. ആയൂർ അഞ്ചൽ റോഡിൽ ജവഹർ ഹൈസ്‌കൂളിന് സമീപം കളപ്പിലാത്തേരി ഭാഗത്തെ വളവിൽ നിർത്തിയിട്ട ലോറിയോട് ചേർന്ന് രക്തം വാർന്ന നിലയിലാണ് മൃതദേഹം കണ്ടെത്തിയത്.
മോഷണശ്രമത്തിനിടെയുള്ള കൊലപാതകമാണെന്നാണ് സംശയം. ഇന്ന് പുലർച്ചെ ഒരു മണിക്കു ശേഷമാണ് സംഭവമെന്നാണ് സൂചന. ഈ സമയത്ത് അഞ്ചംഗ സംഘം ബൈക്കിലും സ്‌കൂട്ടറിലുമായി സമീപ പ്രദേശത്ത് എത്തിയതായും മൊഴിയുണ്ട്.
സമീപത്തുള്ള കടയുടെ മുന്നിൽ ഇരുന്ന ഒരാളെ വാഹമങ്ങളിൽ എത്തിയവർ ആക്രമിക്കാൻ ശ്രമിച്ചെന്നും നാട്ടുകാർ പറയുന്നു. സംഭവത്തിൽ രണ്ടു പേരെ പോലീസ് കസ്റ്റഡിയിലെടുത്തെന്നാണ് സൂചന.
അജയൻപിള്ളയുടെ കാലിൽ മാത്രമാണ് വലിയ മുറിവുകൾ ഉണ്ടായിരുന്നതെന്ന് പോലീസ് പറഞ്ഞു. ചോരവാർന്ന നിലയിൽ അജയൻ പിള്ളയെ ഉടൻ കടയ്ക്കൽ ഗവ. ആശുപത്രിയിൽ എത്തിച്ചെങ്കിലും രക്ഷിക്കാനായില്ല.