മൂന്നാര്: മൂന്നാര് രാജമലയില് മണ്ണിടിച്ചില്. പെട്ടിമുടി തോട്ടം മേഖലയിലാണ് മണ്ണിടിച്ചിലുണ്ടായിരിക്കുന്നത്. 20 വീടുകള് മണ്ണിനടിയില് പെട്ടിട്ടുണ്ടെന്നാണ് സൂചന. തോട്ടം തൊഴിലാളികള് താമസിക്കുന്ന പ്രദേശമാണിത്.
അതേസമയം പെരിയവര പാലം തകര്ന്നതിനാല് പ്രദേശത്തേക്ക് പോലീസിനോ രക്ഷാപ്രവര്ത്തകര്ക്കോ എത്തിച്ചേരാന് സാധിച്ചിട്ടില്ല. പ്രദേശത്തെ ബന്ധിപ്പിക്കുന്ന പെരിയവര പാലം കഴിഞ്ഞ പ്രളയകാലത്താണ് തകര്ന്നത്. പുതിയ പാലത്തിന്റെ നിര്മ്മാണം പൂര്ത്തിയായിട്ടില്ല. കഴിഞ്ഞ ദിവസമുണ്ടായ മഴയില് താല്ക്കാലിക പാലവും തകര്ന്നതോടെ പ്രദേശം പൂര്ണമായും ഒറ്റപ്പെട്ടിരിക്കുകയാണ്. അതുകൊണ്ട് തന്നെ പ്രദേശത്തേക്ക് വാഹനങ്ങള്ക്ക് എത്തിച്ചേരാനാകാത്ത സ്ഥിതിയാണ്.