തൃശ്ശൂർ: തൃശ്ശൂരിൽ നടന്നു പോവുകയായിരുന്നവർക്ക് ഇടയിലേക്ക് കാർ പാഞ്ഞുകയറി നാല് പേർക്ക് ദാരുണാന്ത്യം. അമിതവേഗത്തിൽ എത്തിയ കാറാണ് അപകടമുണ്ടാക്കിയത്. രണ്ട് കുടുംബങ്ങളിലെ നാല് പേരാണ് മരിച്ചത്. കൊറ്റനെല്ലൂർ സ്വദേശികളായ സുബ്രൻ (54) മകൾ പ്രജിത (29), ബാലു ( 52 ) മകൻ വിപിൻ (29) എന്നിവരാണ് മരിച്ചത്.
ഇന്ന് പുലർച്ചെ ഒരു മണിയോടെയായിരുന്നു അപകടം. തുമ്പൂർ അയ്യപ്പൻകാവിൽ ഉത്സവം കഴിഞ്ഞു വീട്ടിലേക്ക് മടങ്ങുന്നവരുടെ ഇടയിലേക്ക് കാർ പാഞ്ഞുകയറുകയായിരുന്നു.
അപകടത്തിൽ പരിക്കേറ്റവരെ മാളയിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇതിൽ ഒരാളുടെ നില ഗുരുതരമാണ്.