ചെന്നൈ: അടവുകള്‍ പലത് പയറ്റിയിട്ടും താഴേക്ക് ചാടുമെന്ന ഭീഷണി മുഴക്കിയ ഇതര സംസ്ഥാന തൊഴിലാളിയെ രക്ഷിക്കാന്‍ മദ്യക്കുപ്പി ഉപയോഗിച്ച് പോലീസ്. ചെന്നൈ റെയില്‍വേ നടപ്പാലത്തില്‍ കയറി നിന്ന് ആത്മഹത്യ ഭീഷണി മുഴക്കിയ ഇതരസംസ്ഥാന തൊഴിലാളിയെയാണ് മദ്യക്കുപ്പി കാണിച്ചു ശ്രദ്ധ തിരിച്ച് റെയില്‍വേ പോലീസ് പിടികൂടിയത്. ചെന്നൈ തിരുവൊട്ടിയൂരിലാണ് ഒഡീഷ സ്വദേശിയുടെ ആത്മഹത്യാ ശ്രമമുണ്ടായത്.
റെയില്‍വേ നടപ്പാലത്തിന്റെ കൈവരിയില്‍ കയറി നിന്ന ഇയാള്‍ താഴേക്കു ചാടി ജീവനൊടുക്കുമെന്നാണ് ഭീഷണി മുഴക്കിയത്. ഈ വിവരമറിഞ്ഞെത്തിയ റെയില്‍വേ പോലീസും അഗ്‌നിരക്ഷാ സേനാംഗങ്ങളും താഴെയിറങ്ങാന്‍ ആവശ്യപ്പെട്ടെങ്കിലും ഇയാള്‍ വഴങ്ങാതെ അവിടെ തന്നെ തുടരുകയായിരുന്നു.
മുന്‍കരുതലായി നടപ്പാലത്തിനു കീഴില്‍ ടാര്‍പായ വിരിച്ച് അഗ്‌നിരക്ഷാ സേനാംഗങ്ങളും നാട്ടുകാരും തയാറായി നിന്നിരുന്നു. ഇതിനിടെയാണു മദ്യക്കുപ്പി കാണിച്ചു ശ്രദ്ധ തിരിച്ച് പോലീസ് തന്ത്രം നടപ്പാക്കിയത്. ഇയാളുടെ ശ്രദ്ധ തിരിഞ്ഞതോടെ അഗ്‌നിരക്ഷാ സേനാംഗങ്ങള്‍ നാട്ടുകാരുടെ സഹായത്തോടെ യുവാവിനെ പിടികൂടി താഴെ ഇറക്കുകയായിരുന്നു.