ജയ്പൂര്‍: ചാണകത്തില്‍ നിന്ന് നിര്‍മ്മിച്ച രാജ്യത്തെ ആദ്യത്തെ പെയിന്റായ ഖാദി പ്രകൃതിക് പെയിന്റിന്റെ പുതിയ ഓട്ടോമേറ്റഡ് നിര്‍മാണ യൂണിറ്റ് കേന്ദ്ര മന്ത്രി നിതിന്‍ ഗഡ്കരി ചൊവ്വാഴ്ച ഉദ്ഘാടനം ചെയ്തു.
ഈ പെയിന്റിന്റെ നിര്‍മ്മാണം ഏറ്റെടുക്കാന്‍ യുവ സംരംഭകരെ പ്രോത്സാഹിപ്പിക്കുന്നതായും അദ്ദേഹം പറഞ്ഞു. ഈ പെയിന്റിന്റെ ബ്രാന്‍ഡ് അംബാസഡര്‍ താനാണെന്ന് കേന്ദ്രമന്ത്രി പ്രഖ്യാപിച്ചു.
മൈക്രോ, ചെറുകിട, ഇടത്തരം സംരംഭങ്ങളുടെ മന്ത്രാലയം ജൂലൈ ആറ് ബുധനാഴ്ച പുറത്തിറക്കിയ പ്രസ്താവനയിലാണ് ഇക്കാര്യം പറഞ്ഞത്. ജയ്പൂരിലെ ഈ പെയിന്റിന്റെ പുതിയ ഓട്ടോമേറ്റഡ് മാനുഫാക്ചറിംഗ് യൂണിറ്റ് ഉദ്ഘാടനം ചെയ്ത അദ്ദേഹം, രാജ്യത്തെ ഗ്രാമീണ സമ്പദ്വ്യവസ്ഥയെ ശാക്തീകരിക്കുന്നതിന് ഇത് വളരെയധികം സഹായകമാകുമെന്ന് പറഞ്ഞു.
ജയ്പൂരിലെ കുമാരപ്പ നാഷണല്‍ ഹാന്‍ഡ്മെയ്ഡ് പേപ്പര്‍ ഇന്‍സ്റ്റിറ്റ്യൂട്ടിന്റെ കാമ്പസിലാണ് പുതിയ പ്ലാന്റ് സ്ഥാപിച്ചത്. പുതിയ മാനുഫാക്ചറിംഗ് യൂണിറ്റ് കമ്മീഷന്‍ ചെയ്യുന്നത് പെയിന്റിന്റെ ഉല്‍പാദന ശേഷി ഇരട്ടിയാക്കും.
ലക്ഷക്കണക്കിന് കോടി രൂപയുടെ അടിസ്ഥാന സൗകര്യ പദ്ധതികളുടെ ഉദ്ഘാടനം പോലും ഇത്രയ്ക്ക് സന്തോഷവും സംതൃപ്തിയും നല്‍കിയിട്ടില്ല. ദരിദ്രരുടെ വികസനമാണ് ഇതിന്റെ ലക്ഷ്യമെന്നും അദ്ദേഹം കൂട്ടിച്ചേര്‍ത്തു. ഓരോ ഗ്രാമത്തിലും ഒരു പെയിന്റ് യൂണിറ്റ് സ്ഥാപിക്കുകയാണ് ലക്ഷ്യമെന്നും ഗഡ്കരിയെ ഉദ്ധരിച്ച് മന്ത്രാലയം അറിയിച്ചു.