മംഗളൂരു: കാറുകള് തമ്മില് കൂട്ടിയിച്ച് 12 വയസുള്ള കുട്ടിയുള്പ്പെടെ 13 പേര് മരിച്ചു. ബംഗളൂരു- മംഗളൂരു ദേശീയ പാതയില് വെള്ളിയാഴ്ച പുലര്ച്ചെ മൂന്നുമണിയോടെയാണ് അപകടം നടന്നത്. തുമകുരു ജില്ലയിലെ കുനിഗല് എന്ന സ്ഥലത്തിന് സമീപമാണ് അപകടം ഉണ്ടായത്. അപകടത്തില് അഞ്ചുപേര്ക്ക് ഗുരുതരമായി പരിക്കേറ്റു.
ടവേര കാറും ബ്രെസ കാറുമാണ് കൂട്ടിയിടിച്ചത്. അമിത വേഗത്തിലെത്തിയ ടവേര കാര് എതിര്ദിശയില് വരുകയായിരുന്ന ബ്രെസ കാറില് ഇടിച്ചുകയറുകയായിരുന്നു. ടവേരയിലുണ്ടായിരുന്ന മൂന്നുപേരും ബ്രെസ കാറിലുണ്ടായിരുന്ന 10പേരും സംഭവസ്ഥലത്ത് വെച്ച് തന്നെ മരിച്ചു. ഗുരുതരമായി പരിക്കേറ്റവരെ വിവിധ ആശുപത്രികളില് പ്രവേശിപ്പിച്ചു.
ബംഗളൂരു, ഹൊസൂര്, തമിഴ്നാട് എന്നിവിടങ്ങളില് ഉള്ളവരാണ് അപകടത്തില്പ്പെട്ടത്. ഹാസനില് നിന്ന് ബംഗളൂരുവിലേക്ക് പോകുകയായിരുന്നു ടവേര കാറിലെ യാത്രക്കാര്. ബംഗളൂരുവില് നിന്ന് ഹാസനിലേക്ക് വരുകയായിരുന്നു ബ്രെസ കാറിലുണ്ടായിരുന്നവര്. സംഭവത്തില് പോലീസ് കേസ് രജിസ്റ്റര് ചെയ്ത് അന്വേഷണം ആരംഭിച്ചു.അപകടത്തെ തുടര്ന്ന് ദേശീയ പാതയില് ഗതാഗതം രണ്ടുമണിക്കൂറോളം സ്തംഭിച്ചു.