കൊല്ലം: മോഷ്ടിക്കാൻ കയറിയ വീട്ടിലെ സ്വർണം തൊടുക പോലും ചെയ്യാതെ മാതൃകാ കള്ളൻ! വീട്ടിലിരുന്ന സ്വർണം കവർന്നില്ലെങ്കിലും ഇവിടെ ഉണ്ടായിരുന്ന രണ്ട് കുപ്പി മദ്യവും പണക്കുടുക്കയും എടുത്ത് തിരികെ പോവുകയായിരുന്നു മോഷ്ടാവ്. കൊല്ലം ചിതറയിലാണ് സംഭവം.
ചുമടുതാങ്ങി സ്വദേശി അംബികയുടെ വീട്ടിലാണ് ഈ മോഷണം നടന്നത്. സംഭവസമയം അംബിക തിരുവനന്തപുരത്തെ കുടുംബ വീട്ടിലും മകൻ ശബരിമലയിൽ തീർത്ഥാടനത്തിനും പോയതായിരുന്നു.
മോഷണ വിവരം ആദ്യമറിഞ്ഞത് ഈ വീടിനടുത്തുള്ള റബർ തോട്ടത്തിൽ ജോലിക്കെത്തിയ സ്ത്രീയാണ്. വീടിന്റെ മുൻഭാഗത്തെ വാതിൽ കുത്തിത്തുറന്ന നിലയിൽ കണ്ടതോടെ ഇവർ നാട്ടുകാരേയും വീട്ടുകാരേയും പോലീസിനേയും വിളിച്ചുവരുത്തുകയായിരുന്നു.
ആദ്യം നാലരപ്പവന്റെ ആഭരണം മോഷണം പോയെന്നായിരുന്നു പരാതി. മാത്രമല്ല മോഷണം നടന്ന മുറിയിൽ വസ്ത്രങ്ങൾ വാരിവലിച്ചിട്ട നിലയിലുമായിരുന്നു. എന്നാൽ ഇതിനിടയിൽ നിന്നും പരിശോധനയ്ക്കിടെ സ്വർണം കണ്ടുകിട്ടി. വിരലടയാള വിദഗ്ധർക്കാണ് സ്വർണം ലഭിച്ചത്.
ALSO READ- കാൽവിരലുകൾ കൊണ്ട് വരച്ച ചിത്രം സമ്മാനിക്കാനെത്തി അമാൻ അലി; ചേർത്ത് പിടിച്ച് അഭിനന്ദിച്ച് മുഖ്യമന്ത്രി
പിന്നീടാണ് ഇവിടെയുണ്ടായിരുന്ന പണക്കുടുക്കയും രണ്ട് കുപ്പി മദ്യവുമാണ് മോഷ്ടാവ് എടുത്തതെന്ന് മനസിലായത്. ആകെ മൂന്ന് കുപ്പി മദ്യവും രണ്ട് കുപ്പി ബിയറുമാണ് വീട്ടിലുണ്ടായിരുന്നത്.
ഇതിൽ ഒരു കുപ്പി ബിയറും അരക്കുപ്പി മദ്യവും വീട്ടിൽ വച്ച് തന്നെ കള്ളൻ കുടിച്ച് തീർത്തു. അതേസമയം, വീട്ടുകാരുമായി പരിചയമുള്ള ആൾ തന്നെയാകാം മോഷണത്തിന് പിന്നിലെന്നാണ് പോലീസ് സംശയിക്കുന്നത്.