റിയോ ഡീ ജനീറോ: ഒരു കള്ളന് കിട്ടിയ പണിയാണ് സോഷ്യല്‍ മീഡിയയില്‍ ചര്‍ച്ചയാവുന്നത്. കഥ കേട്ട എല്ലാവരും ചിരിക്കുന്നു.. ഇനി ഏതായാലും കള്ളന് മോഷണം നിര്‍ത്തുമെന്ന് ഉറപ്പാണ് എന്നാണ് പലരും പറയുന്ന കമന്റ്. ടാക്സി കാത്തുനിന്ന യുവതിയുടെ നേര്‍ക്ക് കളിത്തോക്ക് ചൂണ്ടി കൊള്ളയടിക്കാന്‍ ശ്രമിച്ച കള്ളനാണ് പണി കിട്ടിയത്. യുവതി മിക്സഡ് മാര്‍ഷ്യല്‍ ആര്‍ട്സ് താരമാണെന്ന് അറിയാതെയായിരുന്നു മോഷ്ടാവിന്റെ സാഹസം. ബ്രസീലിലെ റിയോ ഡീ ജനീറോയിലാണ് സംഭവം നടന്നത്.
അള്‍ട്ടിമേറ്റ് ഫൈറ്റിംഗ് ചാമ്പ്യന്‍ഷിപ്പ് ഫൈറ്ററായ പൊളിയാന വിയനയാണ് കള്ളനെ പഞ്ഞിക്കിട്ടത്. യുബര്‍ ടാക്സി കാത്തുനില്‍ക്കുകയായിരുന്നു പൊളിയാന. ഈ സമയം അടുത്തെത്തിയ യുവാവ് സമയം ചോദിച്ചു. സമയം പറഞ്ഞുവെങ്കിലും അയാള്‍ ചുറ്റിപറ്റി നില്‍ക്കുന്നത് കണ്ടതോടെ സംശയം തോന്നി.
പെട്ടെന്ന് അടുത്തെത്തിയ അയാള്‍ ഫോണ്‍ ആവശ്യപ്പെട്ടു. എന്നാല്‍ പ്രതികരിക്കാന്‍ ശ്രമിക്കരുത്, എന്റെ പക്കല്‍ ആയുധമുണ്ട്… എന്ന് ഭീഷണിപ്പെടുത്തി. ശേഷം കളിത്തോക്ക് പുറത്തെടുക്കുകയും ചെയ്തു. എന്നാല്‍ കണ്ണടച്ചു തുറക്കുന്ന വേഗത്തിലായിരുന്നു പൊളിയാനയുടെ പ്രതികരണം. യുവാവ് തോക്ക് നീട്ടുന്നതിന് മുമ്പ് അയാളെ തൊഴിച്ചിട്ടു. രണ്ടു തൊഴി കിട്ടിയതോടെ നിലത്തുവീണ യുവാവിനെ പൊളിയാന നാട്ടുകാരുടെ സഹായത്തോടെ പോലീസില്‍ ഏല്‍പ്പിച്ചു.
പൊളിയാനയുടെയും മോഷ്ടാവിന്റെയും ചിത്രം യുഎഫ്സി പുറത്തുവിട്ടു. മിക്സഡ് മാര്‍ഷ്യല്‍ ആര്‍ട്സ് താരങ്ങള്‍ക്കിടയില്‍ ‘ഉരുക്കുവനിത’ എന്നറിയപ്പെടുന്ന താരമാണ് പൊളിയാന വിയന.