ഇടുക്കി: യുവതി പൊള്ളലേറ്റ് മരിച്ച സംഭവത്തില്‍ ഭര്‍ത്താവിനെ പോലീസ് അറസ്റ്റ് ചെയ്തു. ചൊക്കനാട് കൊളമാങ്കായില്‍ മുത്തുപ്പാണ്ടിയുടെ മകന്‍ ലിവിന്‍ കുമാര്‍ (24)നെയാണ് ഭാര്യ മഹാലക്ഷ്മി മരിച്ച സംഭവത്തില്‍ അറസ്റ്റ് ചെയ്തത്.
കഴിഞ്ഞ ഏഴാം തീയ്യതി ഉച്ചയോടെയാണ് മഹാലക്ഷ്മി ശരീരത്തില്‍ മണ്ണെണ്ണയൊഴിച്ച് ആത്മഹത്യയ്ക്ക് ശ്രമിച്ചത്. സ്ത്രീധനം ആവശ്യപ്പെട്ടും കുട്ടികള്‍ ഇല്ലാത്തതിന്റെ പേരിലും ഭര്‍തൃ വീട്ടുകാരുള്‍പ്പെടെ തന്നെ പീഡിപ്പിച്ചിരുന്നെന്ന് മരിക്കുന്നതിന് തൊട്ടുമുമ്പ് യുവതി ഡോക്ടര്‍ക്കും മജിസ്‌ട്രേറ്റിനും മൊഴി നല്‍കിയിരുന്നു.
തേനി മെഡിക്കല്‍ കോളേജില്‍ ചികിത്സയിലായിരുന്ന യുവതി ബുധനാഴ്ച മരണത്തിന് കീഴടങ്ങി. ചേച്ചിയുടെ ഭര്‍ത്താവിന്റെ പരാതിയില്‍ ലിവിന്‍ കുമാറിനും വീട്ടുകാര്‍ക്കുമെതിരെ കേസെടുത്തു. ദേവികുളം എസ് ഐ ദിലീപ് കുമാറാണ് മൂന്നാര്‍ ഡിവൈഎസ്പി സുനീഷ് ബാബുവിന്റെ നിര്‍ദ്ദേശാനുസരണം അറസ്റ്റ് ചെയ്തത്.