കോട്ടയം: യൂത്ത് കോണ്ഗ്രസ് നാഷണല് ഔട്ട് റീച്ച് സെല് ചെയര്മാന് സ്ഥാനത്ത് നിന്ന് നീക്കിയതിൽ അതൃപ്തി പരസ്യമാക്കി ചാണ്ടി ഉമ്മന് എംഎല്എ. ഉമ്മന്ചാണ്ടിയുടെ ഓര്മ്മദിനത്തില് തന്നെ പാര്ട്ടി ചുമതലയില് നിന്നും നീക്കിയെന്ന് ചാണ്ടി ഉമ്മൻ പറഞ്ഞു.
കോട്ടയത്ത് മാധ്യമങ്ങളോട് പ്രതികരിക്കുകയായിരുന്നു ചാണ്ടി ഉമ്മൻ. തനിക്ക് പറയാനുള്ളത് തിരഞ്ഞെടുപ്പിന് പിന്നാലെ തുറന്ന് പറയുമെന്നും ചാണ്ടി ഉമ്മന് പറഞ്ഞു.
‘എന്റെ പിതാവിന്റെ ഓര്മദിവസമായിരുന്നു എന്നെ സ്ഥാനത്ത് നിന്ന് നീക്കിയത്. വലിയ മാനസിക വിഷമം ഉണ്ടാക്കിയ നടപടി ആയിരുന്നു ഇത്. തീരുമാനം എടുക്കും മുന്പ് തന്നോട് ആലോചിച്ചില്ല. പറഞ്ഞിരുന്നെങ്കില് രാജിവെച്ച് ഒഴിഞ്ഞേനെ. എന്നെ അപമാനിക്കുന്ന രീതിയിലാണ് പുറത്താക്കിയത്. ഇത്തരം ഒരു നടപടിക്ക് കാരണം എന്താണെന്ന് എല്ലാവര്ക്കും അറിയാം. അതിപ്പോള് പറയുന്നില്ല. ഒരു ദിവസം ഞാന് പറയും. തിരഞ്ഞെടുപ്പ് കഴിയട്ടെ’ എന്നും ചാണ്ടി ഉമ്മന് കൂട്ടിച്ചേര്ത്തു.
യൂത്ത് കോണ്ഗ്രസ് അധ്യക്ഷനായി ഓ ജെ ജനീഷിനെ പരിഗണിച്ചതില് കോണ്ഗ്രസില് അതൃപ്തി പുകയുന്നതിനിടെയാണ് ചാണ്ടി ഉമ്മന്റെ പ്രതികരണം.
അബിന് വര്ക്കിയെ അവഗണിച്ച് ഓ ജെ ജനീഷിനെ പരിഗണിച്ചതില് കോണ്ഗ്രസിലെ ഐ ഗ്രൂപ്പ് കടുത്ത വിയോജിപ്പാണുള്ളത്. ഇതിനിടെയാണ് ചാണ്ടി ഉമ്മനും നിലപാട് വ്യക്തമാക്കുന്നത്.