തൃശൂര്: പുതുക്കാട് സ്കൂട്ടറില് ലോറി ഇടിച്ചുണ്ടായ അപകടത്തില് വിദ്യാര്ത്ഥിനി മരിച്ചു. ദേശീയപാതയില് വെച്ചുണ്ടായ അപകടത്തിലാണ് എട്ടാം ക്ലാസുകാരി മരിച്ചത്. പിതാവിനോടൊപ്പം സ്കൂളിലെ ക്രിസ്മസ് ആഘോഷത്തിന് പുറപ്പെട്ട ആമ്പല്ലൂര് വടക്കുമുറി പുത്തന്പറമ്പില് സുനിലിന്റെ മകള് ശിവാനി (14) ആണ് മരിച്ചത്.
തൃശ്ശൂരില് പുതുക്കാട് ഗ്രൗണ്ടിന് സമീപമാണ് അപകടമുണ്ടായത്. റോഡില് വീണുകിടന്ന ഇരുവരെയും കൊടകരയിലെ സ്വകാര്യ ആശുപത്രിയില് എത്തിച്ചെങ്കിലും ശിവാനി മരണപ്പെടുകയായിരുന്നു.
പരുക്കേറ്റ സുനില് ചികിത്സയിലാണ്. നന്തിക്കര ശ്രീരാമകൃഷ്ണ വിദ്യാനികേതന് സ്കൂളിലെ എട്ടാം ക്ലാസ് വിദ്യാര്ത്ഥിയാണ് ശിവാനി. സ്കൂളിലെ ക്രിസ്മസ് ആഘോഷത്തിനായാണ് ശിവാനി പുറപ്പെട്ടത്. ഇതിനിടെയാണ് അപകടമുണ്ടായത്. അപകടത്തെ തുടര്ന്ന് നിര്ത്താതെ പോയ ലോറി അങ്കമാലിയില് വെച്ച് പോലീസ് പിടികൂടി.