ഹരിപ്പാട്: ബസ് യാത്രക്ക് ഇടയില്‍ മാസ്‌ക് ധരിക്കാത്തത് ചെയ്തതിന് കണ്ടക്ടറെ ക്രൂരമായി മര്‍ദ്ദിച്ച് യാത്രക്കാരന്‍. ഹരിപ്പാട് കെഎസ്ആര്‍ടിസി ഡിപ്പോയിലെ കണ്ടക്ടര്‍ ഹരിപ്പാട് പുത്തന്‍പുരയ്ക്കല്‍ വീട്ടില്‍ സജീവനാണ് യാത്രക്കാരന്റെ മര്‍ദനത്തിനിരയായത്.
സജീവനെ ആലപ്പുഴ വണ്ടാനം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. വ്യാഴാഴ്ച രാവിലെ 6.45 ഓടെ അമ്പലപ്പുഴ കച്ചേരി മുക്കില്‍ വെച്ചായിരുന്നു സംഭവം. ഹരിപ്പാട് ഡിപ്പോയില്‍ നിന്നും ആലപ്പുഴ ഡിപ്പോയിലേക്ക് പുറപ്പെട്ട ഓഡിനറി ബസ്സിലാണ് സംഭവം.
അമ്പലപ്പുഴയില്‍ നിന്നും ബസ്സില്‍ കയറിയ ഒരു യാത്രക്കാരന്‍ മാസ്‌ക്ക് ധരിച്ചിരുന്നില്ല. ഇതിനെ സജീവന്‍ ചോദ്യം ചെയ്തതോടെ സജീവന്റെ മൂക്കില്‍ കൈ ചുരുട്ടി ഇടിക്കുകയും മൂക്കില്‍ നിന്നും ചോര വാര്‍ന്ന് ഒഴുകയും ചെയ്തു. ബസ്സില്‍ വീണ് ഇടത് കൈക്കും ഗുരുതര പരിക്കേറ്റു.
അക്രമിയായ യാത്രക്കാരന്‍ ബസ്സില്‍ നിന്ന് ഇറങ്ങി ഓടി രക്ഷപെട്ടു. കണ്ടക്ടര്‍ സജീവന്റെ പരാതിയുടെ അടിസ്ഥാനത്തില്‍ അമ്പലപ്പുഴ സിഐ ദിജേഷിന്റെ നേതൃത്വത്തില്‍ പ്രതിക്ക് വേണ്ടിയുള്ള അന്വേഷണം ഊര്‍ജ്ജിതമാക്കി.