തൃശ്ശൂർ: കൊവിഡിന്റെ പശ്ചാത്തലത്തിൽ മാസ്‌കും സാനിറ്റൈസറുമെല്ലാം അത്യാവശ്യ വസ്തുക്കളായി മാറിയിരിക്കുകയാണ്. അതുകൊണ്ടുതന്നെ മുൻനിര കമ്പനികളെല്ലാം മാസ്‌കിന്റെ വിപണിയിലേക്ക് ഇറങ്ങിയിരിക്കുകയാണ്.
വിവിധ തരത്തിലുള്ള മാസ്‌കുകളും വ്യത്യസ്ത സുഗന്ധമുള്ള സാനിറ്റൈസറുമെല്ലാം വിപണിയെ കീഴടക്കുന്നതിനിടെ ആയുർവേദിക് മാസ്‌കും ട്രാൻസ്പാരന്റ് മാസ്‌കുമൊക്കെ വിപണിയിലിറക്കിയാണ് സ്വർണ്ണവ്യാപാരിയായ ബോബി ചെമ്മണ്ണൂർ വ്യത്യസ്തനായത്.
മുമ്പും ട്രോളന്മാരുടെ ഇരയായ ഇദ്ദേഹത്തെ ഇത്തവണയും ട്രോളന്മാർ വിട്ടില്ല. പ്രാണാ എന്ന പേരിൽ വിപണിയിലിറക്കിയ മാസ്‌കിനെ ട്രോളി മീമുകളും ട്രോൾ വീഡിയോയുമൊക്കെ സോഷ്യൽമീഡിയയിൽ വൈറലാവുകയാണ്. ഇതിനിടെ ഈ ട്രോളുകൾ പങ്കുവെച്ച് സാക്ഷാൽ ബോബി ചെമ്മണ്ണൂർ തന്നെ തന്റെ ട്രോളുകൾക്ക് പ്രചാരം നൽകിയിരിക്കുകയാണ്.
തന്നെയും തന്റെ പ്രൊഡക്ടായ ‘പ്രാണ’യെ ട്രോളുന്നതാണെങ്കിലും ഈ ക്രിയേറ്റിവിറ്റിയെ അഭിനന്ദിക്കാതിരിക്കാനാവില്ല എന്ന് ബോബി ചെമ്മണ്ണൂർ ട്രോളുകൾ പങ്കുവെച്ചുകൊണ്ട് കുറിച്ചിരിക്കുന്നു. സ്‌നേഹം കൊണ്ടും ട്രോൾ കൊണ്ടും ലോകത്തെ കീഴടക്കുക എന്നും ബോബി ഫേസ്ബുക്കിൽ കുറിക്കുന്നു.