ഭോപ്പാല്‍: പുള്ളിപ്പുലിയുടെ ആക്രമണത്തില്‍ നിന്ന് സഹോദരങ്ങളെ രക്ഷപ്പെടുത്തിയത് പിറന്നാള്‍ കേക്ക്. മധ്യപ്രദേശിലെ നേപന്‍നഗറിലാണ് സംഭവം. ഫിറോസ് മന്‍സൂരിയും സഹോദരന്‍ സാബിറുമാണ് അത്ഭുതകരമായി രക്ഷപ്പെട്ടത്.
കഴിഞ്ഞ ദിവസം വൈകീട്ട് ഫിറോസ് മന്‍സൂരിയും സഹോദരന്‍ സാബിറും പിറന്നാള്‍ കേക്ക് വാങ്ങി നേപന്‍നഗറില്‍ നിന്ന് വീട്ടിലേക്ക് മടങ്ങുകയായിരുന്നു. ബൈക്കിലായിരുന്നു യാത്ര.
ഗൊറാദിയ ഗ്രാമത്തിലേക്കുള്ള വഴിയില്‍ എത്തിയതും കരിമ്പിന്‍പാടത്തു നിന്ന് ഒരു പുള്ളിപ്പുലി ഇവരുടെ നേര്‍ക്ക് ചാടി. ഫിറോസായിരുന്നു ബൈക്ക് ഓടിച്ചത്.
പരമാവധി വേഗത്തില്‍ ഓടിച്ചെങ്കിലും പുലി ഇവരുടെ പിന്നാലെ തന്നെയുണ്ടായിരുന്നു. ബൈക്കില്‍ നഖം കൊണ്ട് പുലി മാന്തുക വരെ ചെയ്തതായി ഇരുവരും പറയുന്നു.
പിന്നിലിരുന്ന സാബിറിന്റെ മടിയിലായിരുന്നു കേക്ക് ഉണ്ടായിരുന്നത്. പുലി ബൈക്കിന് തൊട്ടുപിന്നില്‍ എത്തിയതും സാബിര്‍ കേക്ക് പെട്ടിയോടെ പുലിയുടെ മുഖത്തേക്ക് എറിഞ്ഞു.
ഫോറസ്റ്റ് അധികൃതര്‍ എത്തി നടത്തിയ പരിശോധനയില്‍ പുലി തന്നെയാണ് ഇരുവരെയും പിന്തുടര്‍ന്നതെന്ന് കണ്ടെത്തി.