തിരുവനന്തപുരം: ‘അയ്യപ്പനും കോശിയും’ എന്ന ചിത്രത്തിലൂടെ ആരാധരുടെ ആരാധനാപാത്രമായി മാറിയ ചലച്ചിത്ര നടൻ അനിൽ നെടുമങ്ങാട് (48) മുങ്ങി മരിച്ചു. തൊടുപുഴ മലങ്കര ഡാമിലാണ് അപകടമുണ്ടായത്. ഡാമിൽ കുളിക്കാനിറങ്ങിയതിനിടെ കയത്തിൽ അകപ്പെടുകയായിരുന്നു എന്നാണ് വിവരം. ആറ് മണിയോടടുത്തായിരുന്നു സംഭവം.
നിരവധി ചിത്രങ്ങളിൽ അഭിനയിച്ച അനിൽ കമ്മട്ടിപ്പാടം, അയ്യപ്പനും കോശി തുടങ്ങിയ സിനിമകളിലെ പ്രകടനത്തിന് ഏറെ ശ്രദ്ധിക്കപ്പെട്ടിരുന്നു. സിനിമകളിൽ പ്രധാന വേഷങ്ങൾ ചെയ്തുവരികയായിരുന്നു.
ജോജു ജോർജ്ജ് നായകനായ സിനിമയുടെ ഷൂട്ടിങ്ങിനായാണ് അനിൽ ഇവിടേയ്ക്ക് എത്തിയത്. സിനിമയുടെ ഷൂട്ടിങ് ഇടവേളയ്ക്കിടയിൽ തൊട്ടടുത്തുള്ള ഡാമിൽ കുളിക്കാനിറങ്ങിയതായിരുന്നു. ഈ സമയം കയത്തിൽപ്പെടുകയായിരുന്നു. മൃതദേഹം സ്വകാര്യ ആശുപത്രിയിലെത്തിച്ചു. ആശുപത്രിയിലെത്തിക്കുമ്പോൾ തന്നെ മരണപ്പെട്ടിരുന്നുവെന്നാണ് വിവരം. മൃതദേഹം ജില്ലാ ആശുപത്രിയിലേക്ക് മാറ്റും.
ആഭാസം, കിസ്മത് തുടങ്ങിയ സിനിമകളിലും വേഷമിട്ടിട്ടുണ്ട്. സമീപ കാലത്തിറങ്ങിയ നിരവധി ചിത്രങ്ങളിൽ ശ്രദ്ധേയമായ വേഷങ്ങൾ ചെയ്ത അനിൽ നെടുമങ്ങാട്, പുതിയ ചിത്രത്തിന്റെ ഷൂട്ടിങിനായാണ് തൊടുപുഴയിലെത്തിയത്.