ഗുരുതരാവസ്ഥയിലുള്ള രോഗി അകത്ത്; ആംബുലൻസിന് വഴിയൊരുക്കാൻ രണ്ട് കിലോമീറ്ററോളം ഓടി ഈ ട്രാഫിക് പോലീസുകാരൻ; വീഡിയോ

ഹൈദരാബാദ്: വാഹനങ്ങൾ തിങ്ങിനിറഞ്ഞ റോഡിലൂടെ കടന്ന് പോകാൻ കഷ്ടപ്പെടുകയായിരുന്ന ആംബുലൻസിന് വഴിയൊരുക്കാൻ രണ്ട് കിലോമീറ്ററോളം ഓടി ഒരു ട്രാഫിക് പോലീസ് കോൺസ്റ്റബിൾ. തിങ്കളാഴ്ച ഹൈദരാബാദ് നഗരത്തിലെ ഏറെ തിരക്കുള്ള റോഡിലാണ് സംഭവം. ഗുരുതരാവസ്ഥയിലുള്ള രോഗിയുമായി പോകുകയായിരുന്ന ആംബുലൻസിന് വഴിയൊരുക്കാൻ പോലീസുകാരൻ മുന്നിൽ ഓടുകയായിരുന്നെന്ന് ദ ന്യൂ ഇന്ത്യൻ എക്‌സ്പ്രസ് റിപ്പോർട്ട് ചെയ്യുന്നു.

പോലീസുകാരൻ ഓടി വഴിയൊരുക്കുന്ന ദൃശ്യങ്ങൾ സോഷ്യൽമീഡിയയിൽ വ്യാപകമായി പ്രചരിക്കുകയായിരുന്നു. അബിഡ്‌സിൽ നിന്ന് കോട്ടിയിലേക്ക് പോകുകയായിരുന്ന ആംബുലൻസാണ് തിരക്കിൽപ്പെട്ടത്. ആംബുലൻസ് ഡ്രൈവറുടെ ബുദ്ധിമുട്ട് കണ്ടാണ് കോൺസ്റ്റബിൾ സഹായത്തിനെത്തിയത്.

ഈ പോലീസുകാരന്റെ പേര് ജി ബാബ്ജിയെന്നാണ് ദ ന്യൂസ് മിനുട്ട് റിപ്പോർട്ട് ചെയ്യുന്നു. ആംബുലൻസിന് തടസ്സങ്ങളൊന്നുമില്ലെന്ന് ഉറപ്പിച്ച ശേഷമാണ് പോലീസുകാരൻ തന്റെ ഓട്ടം നിർത്തിയത്. സംഭവത്തിന്റെ ദൃശ്യങ്ങൾ ട്രാഫിക് എസിപി അനിൽകുമാറും ട്വീറ്റ് ചെയ്തിട്ടുണ്ട്. പോലീസ് കോൺസ്റ്റബിളിനെ അദ്ദേഹം അഭിനന്ദിക്കുകയും ചെയ്തു.