ന്യൂഡല്ഹി: സ്വകാര്യവത്കരിക്കപ്പെടുന്നില്ലെങ്കില് എയര് ഇന്ത്യയുടെ പ്രവര്ത്തനം അവസാനിപ്പിക്കേണ്ടിവരുമെന്ന് സിവില് ഏവിയേഷന് സഹമന്ത്രി ഹര്ദീപ് സിംഗ് പുരി. പാര്ലമെന്റിലാണ് അദ്ദേഹം ഇക്കാര്യം വ്യക്തമാക്കിയത്.
ഈ വിഷയത്തെ കുറിച്ച് പാര്ലമെന്റ് അംഗത്തിന്റെ ചോദ്യത്തിനുളള മറുപടിയായാണ് മന്ത്രി ഇത്തരത്തില് അഭിപ്രായ പ്രകടനം നടത്തിയത്. നഷ്ടം നേരിടുന്ന ദേശീയ വിമാന കമ്പനിയെ സ്വകാര്യമേഖലയില് നിന്ന് ബിഡ്ഡുകള് ക്ഷണിക്കുന്ന പ്രക്രിയയ്ക്ക് ആഭ്യന്തര, ധനമന്ത്രിമാര് ഉള്പ്പെടെയുള്ള ഒരു സംഘം ഉദ്യോഗസ്ഥര് അന്തിമരൂപം നല്കി വരുന്നതിനിടെയാണ് മന്ത്രിയുടെ അഭിപ്രായപ്രകടനം.
കമ്പനിക്ക് ഇന്ത്യയിലും ലോകമെമ്പാടും ലാഭകരമായ ലാന്ഡിംഗ് സ്ലോട്ടുകളുണ്ടെങ്കിലും എയര് ഇന്ത്യ വര്ഷങ്ങളായി വന് നഷ്ടത്തിലാണ്. കമ്പനിയുടെ ലാഭ നഷ്ടക്കണക്കുകളെ സംബന്ധിച്ച ചില വിശദാംശങ്ങള് ഉദ്യോഗസ്ഥര് സസൂക്ഷ്മം നിരീക്ഷിച്ച് വരികയാണെന്നും പുരി പറഞ്ഞു.
അവ അന്തിമമായി കഴിഞ്ഞാല് ബിഡ്ഡുകള് ക്ഷണിക്കുമെന്നും എയര് ഇന്ത്യ കമ്പനി വില്ക്കാന് സര്ക്കാര് സന്നദ്ധമാണെന്നും അദ്ദേഹം പറഞ്ഞു. കഴിഞ്ഞ വര്ഷം എയര്ലൈനിലെ 76 ശതമാനം ഓഹരി വില്ക്കാനും എയര് ഇന്ത്യയുടെ കടത്തിന്റെ 5.1 ബില്യണ് ഡോളര് ഓഫ്ലോഡ് ചെയ്യാനും ശ്രമിച്ചപ്പോള് ലേലക്കാരെയും ആകര്ഷിക്കുന്നതില് പരാജയപ്പെട്ടു.
ഇത് ഇപ്പോള് ചില നിബന്ധനകള് പുനര്പരിശോധിക്കുകയാണെന്നും എയര്ലൈന് മുഴുവനായും വില്ക്കാന് തയ്യാറാണെന്നും പുരി പറഞ്ഞു.