ചണ്ഡിഗഢ്: വിലയേറെ ഉണ്ടായിട്ടും അതൊന്നും കണക്കാക്കാതെ ലക്ഷങ്ങൾ മുടക്കി കറുത്ത കുതിരയെ വാങ്ങിയ യുവാവിന് കിട്ടിയത് എട്ടിന്റെ പണി. കുളിപ്പിച്ചപ്പോൾ കുതിരയുടെ നിറം ഒലിച്ചു പോയി. പഞ്ചാബ് സ്വദേശിയായ യുവാവാണ് കബളിപ്പിക്കപ്പെട്ടത്. 22.65 ലക്ഷം മുടക്കിയാണ് ഇയാൾ കറുത്ത നിറത്തിലുളള കുതിരയെ വാങ്ങിയത്. എന്നാൽ വീട്ടിലെത്തിച്ച് കുളിപ്പിച്ചപ്പോൾ കറുത്ത കുതിര ചുവന്ന കുതിരയായി മാറുകയായിരുന്നു.
സംഗ്രുർ ജില്ലയിലെ സുനം പട്ടണത്തിൽ തുണിക്കട നടത്തുന്ന രമേശ് കുമാർ ആണ് കുതിരയെ വാങ്ങിയത്. കുതിരയെ വിൽപന നടത്തുന്ന ജതീന്ദർ പാൽ സിംഗ് സെഖോൺ, ലഖ്വീന്ദർ സിംഗ്, ലച്റാ ഖാൻ എന്നിവരാണ് തനിക്ക് കുതിരയെ വിറ്റതെന്ന് രമേശ് കുമാർ പോലീസിനോട് പറഞ്ഞു. മാർവാരി ഇനത്തിലുളള സ്റ്റാലിയൻ കുതിര എന്ന വ്യാജേനെയാണ് ഇവർ കുതിരയെ രമേശ് കുമാറിന് നൽകിയത്.
കറുത്ത നിറം ഒലിച്ചു പോവുകയും കുതിരയുടെ യഥാർത്ഥ നിറമായ ചുവപ്പ് കണ്ടതോടെ നിരാശനായെന്ന് രമേശ് കുമാർ പറയുന്നു. കുതിര ഫാം തുടങ്ങാനാണ് താൻ കറുത്ത കുതിരയെ തന്നെ വാങ്ങിയതെന്നും രമേശ് കുമാർ പറഞ്ഞു.
അതേസമയം, പ്രതികൾക്കെതിരെ വഞ്ചനാക്കുറ്റത്തിന് പോലീസ് കേസെടുത്തിട്ടുണ്ട്. വ്യാജ ഇനത്തിൽപ്പെട്ട കുതിരകളെ വിൽപന നടത്തി പ്രതികൾ എട്ട് പേരെയും കബളിപ്പിച്ചിട്ടുണ്ടെന്നും പോലീസ് പറഞ്ഞു.