കോഴിക്കോട്: ആശുപത്രിയില്‍ നിന്നും പണം മോഷ്ടിച്ച് മുങ്ങിയയാളെ മണിക്കൂറുകള്‍ക്കുള്ളില്‍ മീന്‍ മാര്‍ക്കറ്റില്‍ നിന്നും പിടികൂടി. ഇന്ന് പുലര്‍ച്ചെയാണ് തമിഴ്‌നാട്ടുകാരനും പുതുപ്പാടിയില്‍ താമസക്കാരനുമായ ഗണേശ് ഈങ്ങാപ്പുഴയിലെ സ്വകാര്യ ആശുപത്രിയില്‍ നിന്നും പണം കവര്‍ന്നത്.
കവര്‍ച്ചയ്‌ക്കെത്തുന്നതില്‍ തുടങ്ങി പണവുമായി സ്ഥലം വിടുന്നത് വരെയുള്ള മുഴുവന്‍ ദൃശ്യങ്ങളും ആശുപത്രിയിലെ സിസിടിവിയില്‍ പതിഞ്ഞതാണ് ആളെ തിരിച്ചറിഞ്ഞ് ഉടന്‍ അറസ്റ്റ് ചെയ്യാന്‍ സഹായിച്ചത്.
പുലര്‍ച്ചെ രണ്ട് നാല്‍പതോടെ ആശുപത്രിയിലെ ഫാര്‍മസിയില്‍ കയറിയ ഗണേശന്‍ മേശവലിപ്പ് തുറക്കാന്‍ പലതവണ ശ്രമിച്ച് പരാജയപ്പെട്ടു. പണം സൂക്ഷിച്ചിരുന്ന കൗണ്ടര്‍ ബലം പ്രയോഗിച്ച് നീക്കി പതിനയ്യായിരം രൂപ സ്വന്തമാക്കുകയായിരുന്നു.
പുലര്‍ച്ചെ ജോലി കഴിഞ്ഞ് മടങ്ങാനുള്ള ജീവനക്കാരിയുടെ ബാഗിലുണ്ടായിരുന്ന അറുപത് രൂപയും കൈക്കലാക്കി. സുരക്ഷാ ജീവനക്കാരന്‍ മയങ്ങിയ സമയമാണ് കവര്‍ച്ചയ്ക്കായി തെരഞ്ഞെടുത്തത്.
കവര്‍ച്ച ശ്രദ്ധയില്‍പ്പെട്ട ആശുപത്രി അധികൃതര്‍ സിസിടിവി ദൃശ്യങ്ങള്‍ പരിശോധിച്ചു. കവര്‍ച്ചയുടെ കൃത്യമായ വിവരം കിട്ടി. താമരശേരി പോലീസില്‍ അറിയിച്ചു. നവമാധ്യങ്ങളിലൂടെ ദൃശ്യം പ്രചരിച്ചതിന് പിന്നാലെ പഞ്ചായത്ത് ബസാറിന് സമീപം താമസിക്കുന്ന ഗണേശനെ തിരിച്ചറിഞ്ഞു.
പണവുമായി വീട്ടിലെത്തിയ ഗണേശന്‍ മീന്‍ വാങ്ങാന്‍ കടയിലിറങ്ങിയപ്പോള്‍ തന്നെ പിടിയിലായി. നാട്ടുകാരുടെ സഹായത്തോടെ താമരശേരി പോലീസെത്തി അറസ്റ്റ് ചെയ്യുകയായിരുന്നു. നേരത്തെയും ഗണേശന്‍ സമാാനമായ കവര്‍ച്ച നടത്തിയതായുള്ള വിവരങ്ങള്‍ പുറത്തുവരുന്നുണ്ട്.