കോഴിക്കോട്: ടിക് ടോക്ക് വീഡിയോ എടുക്കുന്നതിനായി കടലുണ്ടിപ്പുഴയിലേക്ക്
ചാടിയ പത്ത് വിദ്യാര്ത്ഥികളെ മത്സ്യത്തൊഴിലാളികള് രക്ഷിച്ചു. തിങ്കളാഴ്ച ഹര്ത്താല് ദിനത്തിലാണ് സംഭവം.
കടലുണ്ടിപ്പുഴ അറബിക്കടലിനോട് ചേരുന്ന കടലുണ്ടി അഴിമുഖത്തെ കടലുണ്ടിക്കടവ് പാലത്തിനുമുകളില് നിന്നാണ് വിദ്യാര്ത്ഥികള് ചാടിയത്. പരപ്പനങ്ങാടി ചാലിയം തീരദേശ പാതയിലാണ് പാലം സ്ഥിതിചെയ്യുന്നത്. പാലത്തിന്റെ കൈവരികളില് കയറിനിന്നാണ് വിദ്യാര്ത്ഥികള് താഴേക്ക് ചാടിയത്.
വിദ്യാര്ത്ഥികള് വെള്ളത്തില് മുങ്ങിത്താഴുന്നത് കണ്ട പാലത്തിന് മുകളിലുള്ളവര് ബഹളം വെച്ചതോടെ സ്ഥലത്തുണ്ടായിരുന്ന മല്സ്യത്തൊഴിലാളികള് ബോട്ടുമായി രക്ഷയ്ക്കെത്തുകയായിരുന്നു.
നേരത്തെ ഇതേ പാലത്തിന് മുകളില് നിന്നും ചില യുവാക്കള് വെള്ളത്തിലേക്ക് ചാടുന്ന വീഡിയോ ടിക് ടോക്കില് വൈറലായിരുന്നു. ഇത് അനുകരിച്ചായിരുന്നു വിദ്യാര്ത്ഥികളുടെ സാഹസം.