‘നിസാരം’ ഒറ്റ ചവിട്ടിന് കാർ വായുവിൽ നിർത്തി ബാലകൃഷ്ണ; എന്തൊരു സിനിമയാണിതെന്ന് പ്രേക്ഷകർ, വീഡിയോ

ട്രെയിനിന് മുകളിലൂടെ ബൈക്കോടിക്കുന്നതും വില്ലന്മാരെ അടിച്ച് തെറിപ്പിച്ച് ആകാശത്തേയ്ക്ക് പറത്ത് വിടുന്നതുമെല്ലാം നന്ദമൂരി ബാലകൃഷ്ണയുടെ സിനിമകളിൽ കാണുന്ന പതിവ് കാഴ്ചകളാണ്. ഇതെല്ലാം ആരാധകർ ആവേശത്തോടെ ഏറ്റെടുക്കാറുമുണ്ട്. ഇപ്പോൾ പുതുതായി ഇറങ്ങിയ ചിത്രത്തിലും ഇത്തരത്തിലൊരു രംഗമാണ് വൈറലാകുന്നത്.

ഈ അതിശയോക്തി കലർന്ന എത്ര രംഗങ്ങൾ കണ്ടാലും പ്രേക്ഷകരിൽ ആവേശം നിറയ്ക്കുന്നു എന്നതാണ് മറ്റൊരു വസ്തുത. ഒരൊറ്റ ചവിട്ടിൽ കാറിന്റെ പുറകുവശം വായുവിലേക്ക് ഉയർന്ന് തെന്നിപ്പോകുന്നതാണ് പുതിയ ചിത്രമായ വീര സിംഗ റെഡ്ഡിയിൽ നിന്നും പ്രചരിക്കുന്നത്. ‘എന്തൊരു സിനിമയാണിത്, രോമാഞ്ചം’ എന്നാണ് ഒരാൾ ഈ രംഗത്തെക്കുറിച്ച് ട്വീറ്റ് ചെയ്തത്.

ചിത്രത്തിൽ ഇതുപോലുള്ള ഒട്ടേറെ രംഗങ്ങൾ ഉൾപ്പെടുത്തിയിട്ടുണ്ട്. പൊങ്കൽ റിലീസായെത്തിയ ചിത്രം 110 കോടി മുതൽ മുടക്കിലാണ് ഒരുക്കിയിരിക്കുന്നത്. രചനയും സംവിധാനവും നിർവഹിച്ചിരിക്കുന്നത് ഗോപിചന്ദ് മലിനേനിയാണ്. ഹണി റോസ്, വരലക്ഷ്മി ശരത് കുമാർ എന്നിവരും ചിത്രത്തിൽ വേഷമിടുന്നുണ്ട്.