മോഹന്‍ലാല്‍ നായകനായി പൃഥ്വിരാജ് സംവിധാനം ചെയ്യുന്ന ലൂസിഫര്‍ ചിത്രത്തിന്റെ ടീസര്‍ നാളെയെത്തും. അതായത് ഡിസംബര്‍ 13 ന്. മനഃപൂര്‍വമാണോ ചിത്രത്തിന്റെ അണിയറ പ്രവര്‍ത്തകര്‍ നാളത്തെ ദിവസം തിരഞ്ഞെടുത്തത് ?
ചിത്രത്തിന്റെ മൊത്തത്തിലുള്ള സ്വഭാവവും 13 എന്ന തിയതിയും തമ്മിലുള്ള ബന്ധം നിഷേധിക്കാനാകില്ല. 13/12/2018 എന്ന തീയതിയിലെ 13-ഉം 18-ഉം മാത്രമെടുക്കുക. ലൂസിഫര്‍ എന്ന പേര് പരാമര്‍ശിച്ചിരിക്കുന്ന വിശുദ്ധ ഗ്രന്ഥമായ ബൈബിളിലെ വെളിപാട് എന്ന ഭാഗത്തിന്റെ 13-ാം അധ്യായത്തിലെ 18-ാം വാക്യം ഇങ്ങനെയാണ്.’ഉള്‍ക്കാഴ്ചയുള്ളവന്‍ കാട്ടുമൃഗത്തിന്റെ സംഖ്യ കണക്കുകൂട്ടിയെടുക്കട്ടെ. അത് ഒരു മനുഷ്യന്റെ സംഖ്യയാണ്. 666 ആണ് അതിന്റെ സംഖ്യ. ജ്ഞാനമുള്ളവര്‍ക്കു മാത്രമേ അതു മനസ്സിലാകൂ.’
ഈ വാക്യത്തില്‍ പരാമര്‍ശിച്ചിരിക്കുന്ന 666 എന്ന സംഖ്യ പൊതുവെ സാത്താന്റെ അല്ലെങ്കില്‍ ചെകുത്താന്റെ സംഖ്യയായാണ് കരുതപ്പെടുന്നത്. ലൂസിഫറില്‍ മോഹന്‍ലാലിന്റെ കഥാപാത്രം ഉപയോഗിച്ചിരിക്കുന്ന കറുത്ത നിറമുള്ള അംബാസിഡര്‍ കാറിന്റെ നമ്പര്‍ KLT 666 ആണ്. ടീസര്‍ റിലീസ് അറിയിച്ച പോസ്റ്ററിലും ഈ കാറാണ് പ്രധാന ചിത്രമായി കൊടുത്തിരിക്കുന്നത്.
അങ്ങനെ നോക്കിയാല്‍ ഈ നമ്പറും അതിന്റെ പ്രത്യേകതയും ബൈബിളിലെ വാക്യവും ഒക്കെ പരസ്പരപൂരകമായി ബന്ധപ്പെട്ടു കിടക്കുന്നു. അപ്പോഴും ഇങ്ങനെയൊക്കെ ചിന്തിച്ചിട്ടാണ് ഡിസംബര്‍ 13-ന് തന്നെ ടീസര്‍ പുറത്തിറക്കാന്‍ അണിയറക്കാര്‍ തീരുമാനിച്ചത് എന്നല്ല പറഞ്ഞു വരുന്നത്. പക്ഷേ ഇത്തരത്തില്‍ ഒരു സാധ്യതയും അവര്‍ ചിന്തിച്ചിരിക്കാം
അന്ധവിശ്വാസങ്ങള്‍ അല്‍പം കൂടുതലുള്ള മേഖലയാണ് സിനിമയെന്നാണ് സംസാരം. അത്തരം വിശ്വാസം മാറ്റിമറിക്കുന്ന തീരുമാനമായിരിക്കും ലൂസിഫറിന്റെ അണിയറ പ്രവര്‍ത്തകരുടേത്.