തിരുവനന്തപുരം: സംസ്ഥാനത്ത് ഇന്ന് 11 പേര്ക്ക് കൂടി കൊവിഡ് സ്ഥിരീകരിച്ചു. ഇതോടെ രോഗബാധിതരുടെ എണ്ണം 437 ആയി ഇയര്ന്നു.കൊവിഡ് അവലോകന യോഗത്തിന് ശേഷം മുഖ്യമന്ത്രി നടത്തിയ വാര്ത്ത സമ്മേളനത്തിലാണ് അദ്ദേഹം ഇക്കാര്യം അറിയിച്ചത്.
കണ്ണൂര് ഏഴ് പേര്ക്കും, കോഴിക്കോട് രണ്ട് പേര്ക്കും, കോട്ടയം മലപ്പുറം ഒരാള്ക്ക് വീതവുമാണ് ഇന്ന് രോഗം സ്ഥിരീകരിച്ചത്. ഇന്ന് രോഗം സ്ഥിരീകരിച്ചവരില് 3 പേര്ക്ക് സമ്പര്ക്കത്തിലൂടെയാണ് രോഗം പകര്ന്നത്. അഞ്ച് പേര് വിദേശത്ത് നിന്ന് എത്തിയവരാണ്. കോഴിക്കോട് ആരോഗ്യ പ്രവര്ത്തകയ്ക്കും രോഗം ബാധിച്ചു. കോഴിക്കോട് മെഡിക്കല് കോളേജിലെ രണ്ട് ഹൗസ് സര്ജന്മാര്ക്കും രോഗം സ്ഥിരീകരിച്ചു. ഇവര് രണ്ട് പേരും കേരളത്തിന് പുറത്ത് നിന്ന് ട്രെയിനില് വന്നവരാണ്. തബ്ലീഗ് സമ്മേളനത്തില് പങ്കെടുത്ത് തിരിച്ചെത്തിയവരുടെ കൂടെ ട്രെയിനില് യാത്ര ചെയ്തത് വഴിയാണ് ഇവര്ക്ക് രോഗം പകര്ന്നത്.
അതെസമയം ഇന്ന് ഒരാള്ക്ക് മാത്രമാണ് രോഗം ഭേദമായത്. പാലക്കാട് ആണ് രോഗം ഭേദമായത്. ഇതോടെ രോഗമുക്തി നേടുന്നവരുടെ എണ്ണം 308 ആയി വര്ധിച്ചു. നിലവില് 127 പേര് ചികിത്സയിലുണ്ട്. സംസ്ഥാനത്ത് ആകെ 29150 പേരാണ് നിരീക്ഷണത്തിലുള്ളത്. അതില് 28804 പേര് വീടുകളിലും 346 പേര് ആശുപത്രിയിലുമാണ്. ഇന്ന് മാത്രം 95 പേരെയാണ് ആശുപത്രിയില് പ്രവേശിപ്പിച്ചത്. ഇതുവരെ 20821 സാമ്പിളുകള് പരിശോധനയ്ക്ക് അയച്ചു. ഇതില് 19998 സാമ്പിളുകള് നെഗറ്റീവായി എന്നും മുഖ്യമന്ത്രി അറിയിച്ചു.