ഹൈദരാബാദ്: ലോകകപ്പ് ടൂര്‍ണമെന്റിലെ പാകിസ്താന്റെ അവസാന മത്സരത്തോടെ രാജ്യാന്തര ഏകദിന മത്സരങ്ങളില്‍ നിന്നും വിരമിക്കല്‍ പ്രഖ്യാപിച്ച പാകിസ്താന്‍ താരം ഷോയ്ബ് മാലിക്കിന് ആശംസയുമായി ഭാര്യ സാനിയ മിര്‍സ. ട്വിറ്ററിലും ഇന്‍സ്റ്റഗ്രാമിലും പോസ്റ്റ് ചെയ്ത കുറിപ്പിലൂടെയാണ് സാനിയ ഭര്‍ത്താവിന് ആശംസകള്‍ നേര്‍ന്നത്. കഴിഞ്ഞ 20 വര്‍ഷത്തിനിടെ ഏകദിന ക്രിക്കറ്റില്‍ മാലിക്ക് കൊയ്‌തെടുത്ത നേട്ടങ്ങളില്‍ തനിക്കും മകന്‍ ഇഹ്‌സാനും അഭിമാനമുണ്ടെന്ന് സാനിയ കുറിച്ചു.
മാലിക്കിന്റെ വിരമിക്കല്‍ പ്രഖ്യാപനത്തിന് പിന്നാലെ ആശംസകളുമായി ടെന്നീസ് താരം കൂടിയായ സാനിയ കുറിച്ചതിങ്ങനെ ‘എല്ലാ കാര്യങ്ങള്‍ക്കും ഒരു അവസാനമുണ്ട്. ജീവിതത്തില്‍ പക്ഷേ, എല്ലാ അവസാനവും മറ്റൊരു തുടക്കം മാത്രമാണ്. ഷോയ്ബ് മാലിക്ക്, നിങ്ങള്‍ രാജ്യത്തിനായി 20 വര്‍ഷത്തോളം കാലം അഭിമാനത്തോടെ കളിച്ചു. അതേ ആദരവോടും എളിമയോടുംകൂടി തുടര്‍ന്നും കളിക്കുക. താങ്കള്‍ സ്വന്തമാക്കിയ എല്ലാ നേട്ടങ്ങളിലും നിങ്ങളെന്ന വ്യക്തിയിലും എനിക്കും ഇസ്ഹാനും അഭിമാനമുണ്ട്. ഇനിയും ആയിരക്കണക്കിന് ട്വന്റി-ട്വന്റി റണ്‍സ് കൂടി നേടാനുമുണ്ട്!’