അബുദാബി: വിദ്യാർത്ഥികളുടെ വിമാന യാത്രകൾക്കായി പ്രത്യേക ആനുകൂല്യങ്ങൾ പ്രഖ്യാപിച്ച് യുഎഇ ദേശീയ വിമാനക്കമ്പനിയായ ഇത്തിഹാദ് എയർവേയ്സ്. ‘ഗ്ലോബൽ സ്റ്റുഡന്റ്’ ഓഫർ എന്ന പേരിലാണ് പ്രത്യേക ആനുകൂല്യങ്ങൾ പ്രഖ്യാപിച്ചിരിക്കുന്നത്. 2020 നവംബർ 30ന് മുമ്പ് ബുക്ക് ചെയ്യുന്ന ടിക്കറ്റുകൾക്കാണ് ഓഫർ.
2021 സെപ്റ്റംബർ 30നകം ഈ ഓഫർ ഉപയോഗിച്ച് യാത്ര ചെയ്യാം. ഓഫർ പ്രകാരം ടിക്കറ്റ് ബുക്ക് ചെയ്യുന്ന വിദ്യാർത്ഥികൾക്ക് ഇക്കോണമി ടിക്കറ്റുകളിൽ പത്ത് ശതമാനവും ബിസിനസ് ക്ലാസ് ടിക്കറ്റുകളിൽ അഞ്ച് ശതമാനവും ഇളവ് ലഭിക്കും.
ഒരുമിച്ച് ടിക്കറ്റുകൾ ബുക്ക് ചെയ്യുകയും വിദ്യാർത്ഥിയ്ക്കൊപ്പം യാത്ര ചെയ്യുകയും ചെയ്താൽ കുടുംബാംഗങ്ങൾക്കും ഇതേ ഇളവ് നേടാമെന്നും പ്രസ്താവനയിൽ കമ്പനി പറയുന്നു.
പ്രമോഷണൽ നിരക്ക് പ്രകാരം ബുക്ക് ചെയ്യുന്ന യാത്രക്കാർക്ക് ഇക്കോണമിയിൽ 40 കിലോഗ്രാം വരെയും ബിസിനസ്സിൽ 50 കിലോഗ്രാം വരെയും ബാഗേജ് അലവൻസ് വർധിപ്പിക്കുമെന്നും യുഎസ്എയിലേക്കോ കാനഡയിലേക്കോ യാത്ര ചെയ്യുകയാണെങ്കിൽ ഒരു അധിക ചെക്ക് ഇൻ ബാഗേജ് ആനുകൂല്യം ഉണ്ടായിരിക്കുമെന്നും ഇത്തിഹാദ് പറഞ്ഞു. യാത്രയ്ക്ക് 96 മണിക്കൂർ മുമ്പ് വരെ അധിക ചാർജുകളില്ലാതെ തീയതി മാറ്റവും അനുവദിക്കും.