ബെയ്ജിങ്: കോവിഡ് 19 വൈറസിന്റെ ഉത്ഭവ രാജ്യമായ ചൈനയില്‍ ഇപ്പോള്‍ കോവിഡ് വ്യാപനം കുറഞ്ഞിരിക്കുകയാണ്. ഒന്‍പത് പേര്‍ക്ക് മാത്രമാണ് വെള്ളിയാഴ്ച ചൈനയില്‍ കോവിഡ് സ്ഥിരീകരിച്ചത്. അതിനാല്‍ സ്‌കൂളുകള്‍ അടുത്തയാഴ്ചയോടെ പൂര്‍ണമായും തുറക്കാനൊരുങ്ങിയിരിക്കുകയാണ് ചൈന.
വെള്ളിയാഴ്ച കോവിഡ് സ്ഥിരീകരിച്ച ഒമ്പതുപേരും പുറത്തുനിന്ന് വന്നവരാണ്. 288 കോവിഡ് രോഗികള്‍ മാത്രമാണ് നിലവില് ചൈനയിലെ ആശുപത്രികളില്‍ ചികിത്സയില്‍ കഴിയുന്നത്. 361 പേര്‍ ഐസൊലേഷനില്‍ കഴിയുന്നുണ്ട്.
ഈ സാഹചര്യത്തിലാണ് ചൈനയിലെ സ്‌കൂളുകള്‍ തിങ്കളാഴ്ചയോടെ പൂര്‍ണമായും തുറക്കാനൊരുങ്ങുന്നത്.
മാസ്‌ക് നിര്‍ബന്ധമാക്കിയും സാമൂഹ്യ അകലം ഉറപ്പാക്കിയുമാവും സ്‌കൂളുകളുടെ പ്രവര്‍ത്തനം. കോളേജുകളിലെ അണ്ടന്‍ഗ്രാജ്വേറ്റ് കോഴ്‌സുകളും അടുത്തയാഴ്ചയോടെ സാധാരണ നിലയിലാകും. ചൈനയിലെ വുഹാന്‍ നഗരത്തില്‍നിന്നാണ് കോവിഡ് പൊട്ടിപ്പുറപ്പെട്ടത്.
85,013 പേര്‍ക്ക് ചൈനയില്‍ കോവിഡ് ബാധിച്ചു. 4634 പേര്‍ കോവിഡ് ബാധിച്ച് മരിച്ചു. ലോകത്താകമാനം പടര്‍ന്നുപിടിച്ച കോവിഡിന്റെ പിടിയില്‍ ഇതിനോടകം കോടിക്കണക്കിനാളുകളാണ് അകപ്പെട്ടത്. ലക്ഷക്കണക്കിന് പേര്‍ക്ക് ജീവന്‍ നഷ്ടമാവുകയും ചെയ്തു.