കൊച്ചി: തൊഴിലാളി ദിനത്തില്‍ ഒട്ടോ ഡ്രൈവറായ പിതാവിന്റെ ഫോട്ടോ പോസ്റ്റ് ചെയ്ത നടന്റെ വാര്‍ത്തയായിരുന്നു സോഷ്യല്‍മീഡിയയില്‍ നിറഞ്ഞിരുന്നത്. അങ്കമാലി ഡയറീസ് എന്ന ചിത്രത്തിലൂടെ ശ്രദ്ധേയനായ പെപ്പെ എന്ന ആന്റണിയുടെ കാര്യമാണ് പറയുന്നത്. താരജാഡ ഒട്ടുമില്ലാത്ത ആന്റണി വരുന്നത് ഒരു സാധാരണ കുടുംബത്തില്‍ നിന്നാണ്.
തൊഴിലാളി ദിനമായ മെയ് ഒന്നിന് അപ്പന്റെ ചിത്രത്തിനൊപ്പം ഫേസ്ബുക്കില്‍ പങ്കുവച്ച ഒരു കുറിപ്പാണ് ഇപ്പോള്‍ വൈറലാകുന്നത് .
”തൊഴിലാളിദിനാശംസകള്‍…. അപ്പനാണ്, ഉച്ചക്ക് ഓട്ടം കഴിഞ്ഞു ചോറുണ്ണാന്‍ വന്നപ്പോള്‍ നിര്‍ബന്ധിപ്പിച്ചു ക്യാമറയ്ക്ക് മുന്നില്‍ പിടിച്ചു നിര്‍ത്തിയത്’ അപ്പന്റെ ചിത്രം പങ്കുവച്ചു കൊണ്ട് ആന്റണി കുറിച്ചു.
മികച്ച പ്രതികരണമാണ് താരത്തിന്റെ പോസ്റ്റിന് താഴെ ലഭിക്കുന്നത്. രാവിലെ മുതല്‍ കുറെ തൊഴിലാളി ദിനാശംസകള്‍ കണ്ടു. പക്ഷെ ഇതാണ് ഒരുപാട് സന്തോഷം തോന്നിയ ഫോട്ടോ ‘എന്നും’ വലിയ സെലിബ്രിറ്റി ആയിട്ടും ഇഷ്ടം പോലെ ഫാന്‍സുണ്ടായിട്ടും സ്വന്തം അച്ഛന്‍ ഓട്ടോ ഡ്രൈവറാന്ന് പറയാന്‍ മടി കാണിക്കാത്ത മനസ്സുള്ള ഇജ്ജാതി കിടുക്കാച്ചി യൂത്തന്‍മാര്‍ മോളിവുഡില്‍ ഉണ്ടോന്നും അവര്‍ ചോദിക്കുന്നു.
സംവിധായകന്‍ അരുണ്‍ ഗോപിയും ആന്റണിയുടെ കുറിപ്പ് പങ്കുവച്ചിട്ടുണ്ട്. ഒരു മകന്‍ ഇതിലും നന്നായി എങ്ങനെയാണ് തൊഴിലാളിദിനം ആശംസിക്കുക അഭിമാനം ആന്റപ്പാ എന്നാണ് അരുണ്‍ ഗോപി കുറിച്ചത്.