ഉത്സവത്തിന്റെ താളവും മേളവും ആനയും ഇഷ്ടമില്ലാത്തവര്‍ കുറവാണ്. ഇവിടെ ആ പ്രിയം ഒരു കുട്ടി കാന്താരിയ്ക്കാണ്. തലയെടുപ്പോടെ നില്‍ക്കുന്ന ആനകളുടെ അടുത്തേയ്ക്കാണ് ആ കാന്താരി ആദ്യം ഓടിയെത്തിയത്. ശേഷം പാപ്പാനോട് കെഞ്ചുകയായിരുന്നു, മറ്റൊന്നിനുമല്ല ആനയെ ഒന്നു തൊടാന്‍. ശേഷം പാപ്പാന്‍ ആനയെ തൊടണമെന്ന കാന്താരിയുടെ ആഗ്രഹം നിറവേറ്റി കൊടുക്കുകയായിരുന്നു.
ഗജവീരന്‍മാര്‍ എന്ന ആനപ്രേമികളുടെ കൂട്ടായ്മയില്‍ പങ്കുവച്ചിരിക്കുന്ന വിഡിയോ ഒട്ടേറെ പേരുടെ ഇഷ്ടം നേടുകയാണ്. പാപ്പാനെ ചാക്കിലാക്കിയാണ് ഈ മിടുക്കി തന്റെ മോഹം നേടിയത്. ഈ മിടുക്കിയുടെ ആവേശത്തിനും ആനയെ അറിയാനുള്ള കൗതുകത്തിന്റെയും മുന്നില്‍ പാപ്പാനും മുട്ടുമടക്കി. പാപ്പാന്റെ കൈപ്പിടിച്ച് അവള്‍ ആ കൊമ്പനെ പതിയെ തലോടി. സമീപത്തുണ്ടായിരുന്നവര്‍ മൊബൈലില്‍ പകര്‍ത്തിയ ദൃശ്യങ്ങള്‍ സോഷ്യല്‍ ലോകത്തും വൈറലാവുകയാണ്.
