കാസര്‍ഗോഡ് : കാസര്‍ഗോഡ് സഹോദരങ്ങള്‍ കുളത്തില്‍ മുങ്ങിമരിച്ചു. മഞ്ചേശ്വരത്തെ അബ്ദുള്‍ ഖാദര്‍ നസീമ ദമ്പതികളുടെ മക്കളായ നവാസ് റഹ്‌മാന്‍ (22), നാദില്‍ (17) എന്നിവരാണ് മരിച്ചത്.
പെരുന്നാള്‍ ആഘോഷത്തിന് മുത്തച്ഛന്റെ വീട്ടിലെത്തിയതായിരുന്നു റഹ്‌മാനും നാദിലും. ഇരുവരും കുളത്തില്‍ കുളിക്കാനിറങ്ങിയപ്പോഴാണ് അപകടം സംഭവിച്ചത്. മൊഗ്രാല്‍ കൊപ്പളത്ത് ഇന്ന് ഉച്ചയോടെയായിരുന്നു സംഭവം.
ഇരുവരും മുങ്ങിത്താഴുകയായിരുന്നു. വിവരം അറിഞ്ഞു കുമ്പള പൊലീസ് സ്ഥലത്ത് എത്തിയിരുന്നു. ഓടിക്കൂടിയ നാട്ടുകാരാണ് മൃതദേഹം കുളത്തില്‍ നിന്ന് പുറത്തെടുത്തത്.
മൃതദേഹം മംഗല്‍പാടി താലൂക്ക് ആശുപത്രിയിലെ മോര്‍ച്ചറിയിലേക്ക് മാറ്റി. സഹോദരങ്ങളുടെ വിയോഗവാര്‍ത്ത ഉറ്റവരെയും ബന്ധുക്കളെയും സുഹൃത്തുക്കളെയും നാടിനെയും വേദനയിലാഴ്ത്തി.
