തിരുവനന്തപുരം: ഏപ്രിൽ ഒന്നുമുതൽ വൈദ്യുതിനിരക്ക് വർധനവിന് സാധ്യത. നിരക്ക് ഉയർത്താനുള്ള അപേക്ഷ റെഗുലേറ്ററി കമ്മിഷനുമുമ്പാകെ വൈദ്യുതിബോർഡ് സമർപ്പിച്ചു. അടുത്ത നാലുവർഷത്തേക്കുള്ള നിരക്കുകളാണ് സമർപ്പിച്ചിരിക്കുന്നത്. 2023-24 വർഷത്തേക്ക് യൂണിറ്റിന് 40 പൈസയുടെ വർധനയാണ് ഉന്നയിച്ചിരിക്കുന്ന ആവശ്യം. കമ്മിഷന്റെ ഹിയറിങ്ങിനുശേഷമേ അന്തിമ തീരുമാനം ഉണ്ടാകൂ എന്നാണ് വിവരം.
ഈ സാമ്പത്തികവർഷം വൈദ്യുതിബോർഡിന് 2,939 കോടി രൂപ റവന്യൂകമ്മി ഉണ്ടാവുമെന്ന് കമ്മിഷൻ നേരത്തേ അംഗീകരിച്ചിട്ടുള്ളതിനാൽ താരിഫ് വർധനയ്ക്ക് കമ്മിഷൻ തടസ്സംനിൽക്കാനിടയില്ല. മാർച്ച് 31 വരെയുള്ള നിരക്കാണ് കഴിഞ്ഞ ജൂണിൽ ഏഴുശതമാനം വർധനയോടെ നിശ്ചയിച്ചത്.
അഞ്ചുവർഷത്തേക്കുള്ള നിരക്കുവർധന അന്ന് വൈദ്യുതിബോർഡ് സമർപ്പിച്ചെങ്കിലും 2022-23 വർഷത്തേക്കുള്ളതുമാത്രമാണ് നിശ്ചയിച്ചിരുന്നത്. വേഗത്തിൽ ഹിയറിങ് നടത്തി തീരുമാനം കൈകൊണ്ടാൽ ഏപ്രിലിൽ തന്നെ വർധനവുണ്ടായേക്കുമെന്നാണ് ലഭിക്കുന്ന വിവരം.