പാലക്കാട്: പാലക്കാട് ഏഴാംക്ലാസ് വിദ്യാര്‍ത്ഥിനിയെ സ്‌കൂളില്‍ കാണാതായ സംഭവത്തില്‍ പ്രതിഷേധവുമായി നാട്ടുകാര്‍. അലനല്ലൂര്‍ ജിവിഎച്ച്എസ്എസിലെ വിദ്യാര്‍ത്ഥിനിയെയാണ് ഇന്നലെ വൈകിട്ടോടെ കാണാതായത്. തുടര്‍ന്ന് നടത്തിയ അന്വേഷണത്തില്‍ വിദ്യാര്‍ത്ഥിനിയെ സ്‌കൂളിന്റെ മൂന്നാം നിലയില്‍ കെട്ടിയിട്ട നിലയില്‍ കണ്ടെത്തിയിരുന്നു.
സംഭവത്തില്‍ പ്രതിഷേധമറിയിച്ച് സ്‌കൂളിലെത്തിയ നാട്ടുകാര്‍ സ്‌കൂള്‍ ജീവനക്കാര്‍ കുട്ടികളുടെ കാര്യത്തില്‍ ശ്രദ്ധ പുലര്‍ത്തുന്നില്ലെന്നും സ്‌കൂള്‍ വിട്ട് വിദ്യാര്‍ത്ഥികള്‍ വീടുകളിലേക്ക് മടങ്ങുന്നതിന് മുന്‍പ് അധ്യാപകര്‍ വീട്ടില്‍ പോകുന്നുവെന്നും ആരോപിച്ചു.
കാണാതായ വിദ്യാര്‍ത്ഥിനിടെ കഴിഞ്ഞ ദിവസം ഒമ്പത് മണിയോടെയാണ് കണ്ടെത്തിയത്. കുട്ടിയുടെ കൈകള്‍ ബന്ധിച്ച നിലയിലായിരുന്നു. അതേസമയം, കുട്ടിയുടെ ശരീരത്തില്‍ പിടിവലി നടന്നതിന്റെയോ ബലം പ്രയോഗിച്ചതിന്റെയോ പാടുകളില്ല.
സംഭവത്തില്‍ നാട്ടുകല്‍ പൊലീസിന്റെ അന്വേഷണം തുടരുകയാണ്. സ്വയം ഒളിച്ചിരുന്നതാണെന്നാണ് പെണ്‍കുട്ടി പൊലീസിന് മൊഴി നല്‍കിയത്. എസ്ഐയുടെ നേതൃത്വത്തിലുള്ള സംഘം കുട്ടിയുടെ വീട്ടിലെത്തി മൊഴി രേഖപ്പെടുത്തിയിരുന്നു.
