തിരുവനന്തപുരം: ആംബുലന്‍സ് ഡ്രൈവറുടെ കഴുത്തിന് പിടിച്ച് രോഗിയുടെ അപ്രതീക്ഷിത ആക്രമണം. രോഗിയുടെ ആക്രമണത്തില്‍ നിയന്ത്രണം വിട്ട് ആംബുലന്‍സ് മറിഞ്ഞ് ഡ്രൈവര്‍ക്ക് പരിക്ക്. ഞായറാഴ്ച രാത്രി കാട്ടാക്കട ചീനിവിള അണപ്പാടാണ് ആംബുലന്‍സ് അപകടത്തില്‍പ്പെട്ടത്. മദ്യലഹരിയിലായിരുന്നു രോഗി ഡ്രൈവറെ ആക്രമിച്ചത്.
കാലിന് പരിക്കേറ്റ് കാട്ടാക്കട താലൂക്ക് ആശുപത്രിയില്‍ ചികിത്സ തേടിയ എത്തിയ യുവാവാണ് തിരികെയുള്ള യാത്രയ്ക്കിടെ ആക്രമിച്ചത്. നേരത്തെ ചികിത്സ തേടിയെത്തിയ സമയത്ത് ആശുപത്രിയില്‍ ബഹളം വച്ചതിനേത്തുടര്‍ന്ന് ഇയാള്‍ക്കൊപ്പമുണ്ടായിരുന്നവര്‍ യുവാവിനെ ആശുപത്രിയില്‍ വിട്ട് മടങ്ങുകയായിരുന്നു.
ചികിത്സ നേടിയ ശേഷം കുഴിവിളയിലെ വീട്ടിലേക്ക് പോകാനാണ് യുവാവ് ആംബുലന്‍സ് സഹായം തേടിയത്. ആംബുലന്‍സില്‍ ഡ്രൈവര്‍ക്കൊപ്പം സംസാരിച്ചിരുന്ന യുവാവ് അണപ്പാട് എത്തിയതോടെ അക്രമാസക്തനാവുകയായിരുന്നു. പെട്ടന്നുള്ള ആക്രമണത്തില്‍ നിയന്ത്രണം നഷ്ടമായ ആംബുലന്‍സ് സമീപത്തെ പുഴയിടത്തിലേക്ക് മറിയുകയായിരുന്നു. ആംബുലന്‍സ് ഡ്രൈവര്‍ അമലിന് പരിക്കേറ്റു. സംഭവശേഷം മുങ്ങിയ രോഗിക്കായി പോലീസ് അന്വേഷണം നടത്തി വരികയാണ്.