തിരുവനന്തപുരം; എസ്എസ്എല്സി, പ്ലസ്ടു, വിഎച്ച്എസ്ഇ പരീക്ഷകള് മാറ്റി. പരീക്ഷകള് ഏപ്രില് എട്ടു മുതല് നടത്തും. പരീക്ഷ മാറ്റാന് കേന്ദ്ര തിരഞ്ഞെടുപ്പു കമ്മിഷന് അനുമതി നല്കി. എസ്എസ്എല്സി, പ്ലസ് ടു പരീക്ഷകള് മാറ്റി വയ്ക്കണമെന്ന് നേരത്തെ സംസ്ഥാന സര്ക്കാര് തെരഞ്ഞെടുപ്പ് കമ്മീഷനോടാവശ്യപ്പെട്ടിരുന്നു.. ഈ മാസം 17 ന് തുടങ്ങുന്ന പരീക്ഷ മാറ്റി വയ്ക്കണമെന്നാണ് സര്ക്കാര് ആവശ്യപ്പെട്ടിരുന്നത്.
അധ്യാപകര്ക്ക് തെരഞ്ഞെടുപ്പ് ഡ്യൂട്ടി ഉള്ളതിനാലാണ് തെരഞ്ഞെടുപ്പ് കമ്മീഷനോട് അനുമതി തേടിയത്. ഏപ്രില് ആറിനാണ് സംസ്ഥാനത്ത് തെരഞ്ഞെടുപ്പ്. മെയ് രണ്ടിനാണ് വോട്ടെണ്ണല്. മാര്ച്ച് 12 ന് തെരഞ്ഞെടുപ്പ് വിജ്ഞാപനം പുറപ്പെടുവിക്കും. മാര്ച്ച് 19 ന് പത്രിക സമര്പ്പിക്കാനുള്ള സമയ പരിധി അവസാനിക്കും. മാര്ച്ച് 20 ന് സൂക്ഷ്മ പരിശോധന നടക്കും. മാര്ച്ച് 22 ന് പത്രിക പിന്വലിക്കാനുള്ള അവസാന ദിവസമാണ്.
ഒറ്റ ഘട്ടമായാണ് കേരളത്തില് തെരഞ്ഞെടുപ്പ്. കേരളത്തില് 40,711 പോളിങ് സ്റ്റേഷനുകളാണ് ഉണ്ടാവുക. കൊവിഡ് മാനദണ്ഡങ്ങള് പാലിച്ചു തെരഞ്ഞെടുപ്പു നടത്താനാണ് പോളിങ് സ്റ്റേഷനുകളുടെ എണ്ണം കൂട്ടിയത്. അതേസമയം പ്രവാസികള്ക്ക് തപാല് വോട്ടിനുള്ള സൗകര്യം ഇത്തവണയില്ല. 80 വയസ്സിന് മുകളിലുള്ളവര്ക്ക് തപാല് വോട്ട് വഴി വോട്ട് രേഖപ്പെടുത്താനുള്ള സൗകര്യം ഒരുക്കും. കൊവിഡ് ബാധിതര്ക്കും വോട്ട് ചെയ്യാന് അവസരമൊരുക്കുമെന്നും സുനില് അറോറ അറിയിച്ചു.