കൊച്ചി: ഇന്ന് മഹാനവമി. മഹാനവമിയുടെ ഭാഗമായുള്ള പൂജകള്‍ ഇത്തവണ രണ്ടുദിവസമാണ് നടക്കുക. തിങ്കളാഴ്ചയാണ് വിജയദശമിയും വിദ്യാരംഭവും നടക്കുക. കോവിഡ് സാഹചര്യം കണക്കിലെടുത്ത് ഇത്തവണ വീടുകളില്‍ തന്നെയാണ് പൂജകള്‍.
ദുര്‍ഗാഷ്ടമി ദിനമായ ഇന്നലെ വിദ്യാര്‍ഥികള്‍ പഠനോപകരണങ്ങള്‍ പൂജവച്ചു. വീടുകളിലും ക്ഷേത്രങ്ങളിലുമാണ് പുസ്തകങ്ങളും ആയുധങ്ങളും പൂജയ്ക്ക് വച്ചത്. പതിവ് പഠനോപകരണങ്ങളായ പാഠപുസ്തകങ്ങള്‍ക്കും നോട്ട്ബുക്കുകള്‍ക്കും ഒപ്പം മൊബൈല്‍ ഫോണും ടാബും ഇക്കുറി പലരും പൂജവച്ചു.
സംസ്ഥാനത്ത് കോവിഡിന്റെ പശ്ചാത്തലത്തില്‍ ആഘോഷങ്ങള്‍ക്ക് കര്‍ശന നിയന്ത്രണം ഏര്‍പ്പെടുത്തിയിട്ടുണ്ട്. കണ്ടെയ്ന്‍മെന്റ് സോണില്‍ വീടിനുപുറത്ത് ആഘോഷം വേണ്ട. പ്രായമായവര്‍, ഗര്‍ഭിണികള്‍, കുട്ടികള്‍, ഗുരുതര രോഗമുള്ളവര്‍ എന്നിവര്‍ വീടിനുള്ളില്‍ കഴിയണം.
വിദ്യാരംഭ ചടങ്ങിന് വീട്ടില്‍ രണ്ടോ മൂന്നോ അടുത്ത കുടുംബാംഗങ്ങള്‍മാത്രം മതി. നാവില്‍ എഴുതാന്‍ ഒരുകുട്ടിക്ക് ഉപയോഗിച്ച സ്വര്ണം അടക്കമുള്ളവ മറ്റു കുട്ടികള്‍ക്ക് ഉപയോഗിക്കരുതെന്നും സര്‍ക്കാര്‍ അറിയിച്ചിരുന്നു.