കോതമംഗലം: മദ്യലഹരിയില് ചേര പാമ്പിനെ തല്ലിക്കൊന്ന് കറിവെച്ച് ടച്ചിംഗ്സാക്കിയ യുവാവ് അറസ്റ്റില്. നേര്യമംഗലം വടക്കെപ്പറമ്പില് വി.ജെ. ബിജു (മരപ്പട്ടി ബിജു- 35) വാണ് അറസ്റ്റിലായത്. ശനിയാഴ്ച വൈകുന്നേരമായിരുന്നു സംഭവം.
നേര്യമംഗലം കോളനിക്കു സീപമാണ് ബിജുവിന്റെ വീട്. ഇവിടെ ഒറ്റക്കിരുന്നു മദ്യപിക്കുന്നതിനിടയിലാണ് പറമ്പിലൂടെ ചേരപ്പാമ്പ് ഇഴഞ്ഞു നീങ്ങുന്നത് കണ്ടത്. പെരുമ്പാമ്പ് ആണെന്ന് കരുതി ഉടന് തന്നെ വടിയുമായി ചെന്നു പാമ്പിനെ അടിച്ചു കൊന്നു. തുടര്ന്നു പാമ്പിന്റെ തോലുരിഞ്ഞ് വറുത്ത ശേഷം കറിവച്ചു. പിന്നീട് ചേരക്കറിയും കൂട്ടി വീണ്ടും മദ്യപാനം തുടര്ന്നു.
അടിച്ച് പാമ്പ് ആയതോടെ ബാക്കി വന്ന കറി വില്ക്കാനും ബിജു ശ്രമിച്ചു. ഇതാണ് ബിജുവിനെ കുടുക്കിയത്. പാമ്പ് കറി വില്ക്കാന് ശ്രമം നടക്കുന്നു എന്നറിഞ്ഞെത്തിയ വനപാലകര് തൊണ്ടിമുതലായ ചേരക്കറിയും ചട്ടിയും സഹിതം പ്രതിയെ പിടികൂടുകയായിരുന്നു. നേര്യമംഗലം റേഞ്ചിലെ നഗരമ്പാറ സ്റ്റേഷനിലെ വനപാലകരാണ് ഇയാളെ അറസ്റ്റ് ചെയ്തത്.
വന്യജീവി സംരക്ഷിത പട്ടിക രണ്ടില് ഉള്പ്പെടുന്ന ഉരഗവര്ഗമാണ് ചേര. നിരവധി തടിമോഷണ കേസുകളിലെ പ്രതികൂടിയാണ് ഇയാള്.