കോഴിക്കോട്: മുഖ്യമന്ത്രി പിണറായി വിജയനെ രൂക്ഷമായി വിമര്‍ശിച്ച് ഫേസ്ബുക്കില്‍ പോസ്റ്റിട്ട പ്രവാസി മലയാളിക്കെതിരെ കേസെടുത്ത് പോലീസ്. കോഴിക്കോട് ജില്ലയിലെ കരിമ്പനപ്പാലം സ്വദേശിയായ ബിബിത്ത് കോഴിക്കളത്തിലിനെതിരെയാണ് പോലീസ് കേസെടുത്തിരിക്കുന്നത്.
ടിപി ചന്ദ്രശേഖരന്‍ വധം ഉള്‍പ്പടെയുള്ള രാഷ്ട്രീയ സംഭവവികാസങ്ങള്‍ ചൂണ്ടിക്കാട്ടി മുഖ്യമന്ത്രി പിണറായി വിജയനെ വിമര്‍ശിച്ചുകൊണ്ടായിരുന്നു ബിബിത്തിന്റെ ഫേസ്ബുക്ക് കുറിപ്പ്. സിപിഎം വടകര ഏരിയാ കമ്മിറ്റി സെക്രട്ടറിയാണ് ഇതുസംബന്ധിച്ച് പോലീസില്‍ പരാതി നല്‍കിയത്.
യുവാവിന്റെ ഫേസ്ബുക്ക് കുറിപ്പ് ലോക്ക്ഡൗണ്‍ കാലത്ത് സാമൂഹിക സ്പര്‍ധ സൃഷ്ടിക്കുമെന്ന് സെക്രട്ടറി പോലീസിന് നല്‍കിയ പരാതിയില്‍ ചൂണ്ടിക്കാട്ടി. ഈ പാരാതിയുടെ അടിസ്ഥാനത്തിലാണ് ബിബിത്തിനെതിരെ പോലീസ് കേസെടുത്തിരിക്കുന്നത്.
സാമൂഹിക സ്പര്‍ധ സൃഷ്ടിക്കല്‍, അപകീര്‍ത്തിപ്പെടുത്തല്‍ എന്നീ വകുപ്പുകള്‍ ചുമത്തിയാണ് കേസ്. ഖത്തറില്‍ ജോലി ചെയ്യുന്ന ബിബിത്ത് മന്ത്രി തോമസ് ഐസക്കിന്റെ മുന്‍ പേഴ്‌സണല്‍ സ്റ്റാഫ് അംഗമാണ്. ഡിവൈഎഫ്‌ഐ വടകര ബ്ലോക് കമ്മിറ്റി ഭാരവാഹി ആയിരുന്ന ഇയാള്‍ പിന്നീട് അഭിപ്രായഭിന്നതയെ തുടര്‍ന്ന് പാര്‍ട്ടി വിടുകയായിരുന്നു.