ഹൈദരാബാദ്: കേന്ദ്രസര്‍ക്കാരിന്റെ ചിറ്റമ്മ നയത്തിനെതിരെ നിലപാട് കടുപ്പിച്ച് ആന്ധ്രാപ്രദേശ് മുഖ്യമന്ത്രിയും തെലുങ്ക് ദേശം പാര്‍ട്ടി നേതാവുമായ ചന്ദ്രബാബു നായിഡു. സംസ്ഥാനത്തിന് പ്രത്യേക പദവിയെന്ന വാഗ്ദാനം പാലിച്ചില്ലെന്ന് ആരോപിച്ച് നിയമസഭയില്‍ കറുപ്പ് വസ്ത്രം ധരിച്ചാണ് അദ്ദേഹം എത്തിയത്.
ചന്ദ്രബാബു നായിഡുവിന്റെ മകനും മന്ത്രിയുമായ നാരാ ലോകേഷും മറ്റ് പാര്‍ട്ടി എംഎല്‍എമാരും കറുപ്പണിഞ്ഞ് തന്നെയാണ് നിയമസഭയിലെത്തിയത്. ആന്ധ്രാപ്രദേശിന് പ്രത്യേക പദവി അടക്കമുള്ള വാഗ്ദാനങ്ങള്‍ പാലിക്കാത്ത മോദിയുടെ ചിറ്റമ്മന നയത്തിനെതിരെയാണ് തങ്ങളുടെ പ്രതിഷേധമെന്ന് ലോകേഷ് ട്വീറ്റ് ചെയ്തു.
വെള്ളയും മഞ്ഞയും ക്രീം കളറിലുമുള്ള വസ്ത്രങ്ങള്‍ മാത്രമാണ് ചന്ദ്രബാബു നായിഡു ധരിക്കാറ്. ഇതാദ്യമായാണ് ചന്ദ്രബാബു നായിഡു കറുപ്പണിയുന്നത്. പ്രതിപക്ഷമായിരിക്കുമ്പോഴും പ്രതിഷേധം രേഖപ്പെടുത്താനായി കറുത്ത ബാഡ്ജ് മാത്രമാണ് ചന്ദ്രബാബു നായിഡു ധരിക്കാറെന്നും തെലുങ്ക് ദേശം പാര്‍ട്ടിയുടെ അടുത്ത വൃത്തങ്ങള്‍ പറയുന്നു.