മുംബൈ: കഷണ്ടിയാണെന്നും വിഗ്ഗ് വെച്ചതാണെന്നുമുള്ള സത്യം മറച്ചുവെച്ച് തന്നെ വിവാഹം കഴിച്ചെന്ന് ആരോപിച്ച് ഭർത്താവിനെതിരെ പോലീസിൽ പരാതി നൽകി ഭാര്യ. 27 കാരിയായ മുംബൈ സ്വദേശിനിയാണ് കഷണ്ടി മറച്ചുവച്ച് വിവാഹം കഴിച്ചുവെന്ന് ചൂണ്ടിക്കാട്ടി ഭർത്താവിനെതിരെ വിശ്വാസ വഞ്ചന ആരോപിച്ച് പോലീസിനെ സമീപിച്ചിരിക്കുന്നത്. ഇരുവരും അടുത്തിടെയാണ് വിവാഹിതരായത്. വിവാഹത്തിന് മുൻപ് കഷണ്ടിയാണെന്ന കാര്യം ഭർത്താവ് തന്നോട് പറഞ്ഞില്ലെന്നാണ് യുവതി പറയുന്നത്. ഭർത്താവ് വിഗ്ഗ് വെച്ചിട്ടുണ്ടെന്ന സത്യം താൻ ഞെട്ടലോടെയാണ് തിരിച്ചറിഞ്ഞതെന്നും യുവതി പരാതിയിൽ ചൂണ്ടിക്കാട്ടുന്നു.
29 വയസുകാരനായ യുവതിയുടെ ഭർത്താവ് ഒരു സ്വകാര്യ സ്ഥാപനത്തിലെ ജീവനക്കാരനാണ്. അതേസമയം, പോലീസ് കേസെടുത്തതോടെ അറസ്റ്റ് ഒഴിവാക്കാൻ മുൻകൂർ ജാമ്യഹർജിയുമായി യുവാവ് കോടതിയെ സമീപിച്ചു.
ഭർത്താവ് വിഗ്ഗ് വെച്ചതാണെന്ന് നേരത്തെ അറിഞ്ഞിരുന്നുവെങ്കിൽ താൻ വിവാഹത്തിന് സമ്മതിക്കുമായിരുന്നില്ലെന്നും പരാതിയിലുണ്ട്. ഇക്കാര്യം ഭർത്താവിന്റെ ബന്ധുക്കളെ അറിയിച്ചുവെങ്കിലും ഇതത്ര വലിയ കാര്യമാക്കേണ്ടതില്ലെന്ന പ്രതികരണമാണ് അവരുടെ ഭാഗത്ത് നിന്നും ഉണ്ടായതെന്നും യുവതി പറയുന്നു.