പ്രതീക്ഷകള് വാനോളം ഉയര്ത്തി കുമ്പളങ്ങി നൈറ്റ്സിന്റെ ട്രെയിലര് പുറത്തിറങ്ങി. മായാനദിക്ക് ശേഷം ശ്യാം പുഷ്ക്കര് തിരക്കഥ ഒരുക്കുന്ന ചിത്രം വലിയ പ്രതീക്ഷകളോടെയാണ് സിനിമാ ആരാധകര് കാത്തിരുന്നത്. ആരാധകരെ നിരാശനാക്കാതെ പ്രതീക്ഷകള് ഇരട്ടിയാക്കിയിരിക്കുകയാണ് ചിത്രത്തിന്റെ ട്രെയിലര്. ഷൈന് നിഗം, ഫഹദ് ഫാസില്, സൗബിന് ഷാഹിര്, ശ്രീനാഥ് ഭാസി എന്നിവര് കേന്ദ്ര കഥാപാത്രത്തെ അവതരിപ്പിക്കുന്ന ചിത്രം സംവിധാനം ചെയ്തിരിക്കുന്നത് നവാഗതനായ മധു സി നാരായണനാണ്.
പ്രണയവും സൗഹൃദവും അതിലൂടെ ഉടലെടുക്കുന്ന പ്രശ്നങ്ങളും ജീവിത ഗന്ധിയായ നിമിഷങ്ങളുമാണ് ട്രെയിലറില് ഉള്ളത്. ചിത്രത്തില് പ്രതിനായക വേഷത്തില് ഫഹദ് ഫാസിലും എത്തുന്നുണ്ട്. ചിത്രം നിര്മ്മിച്ചിരിക്കുന്നത് ദിലീഷ് പോത്തന്, നസ്രിയ നസീം, ശ്യാം പുഷ്കരന് എന്നിവര് ചേര്ന്നാണ്. ഷൈജു ഖാലിദ് ചായാഗ്രഹണവും എഡിറ്റിങ് സൈജു ശ്രീധരനുമാണ് നിര്വ്വഹിച്ചിരിക്കുന്നത്. ഫഹദ് ഫാസില് ആന്റ് ഫ്രണ്ട്സ്, വര്ക്കിങ് ക്ലാസ് ഹീറോ എന്നിവരുടെ ബാനറില് നിര്മ്മിക്കുന്ന സിനിമ ഫെബ്രുവരി ഏഴിന് തീയേറ്ററുകളിലെത്തും.