മുംബൈ: പ്രമുഖ ആശുപത്രി തങ്ങളുടെ പരസ്യവുമായി സഹകരിക്കാൻ ആവശ്യപ്പെട്ട് രംഗത്തെത്തിയപ്പോൾ നടൻ സോനു സൂദ് പകരം ചോദിച്ചത് സൗജന്യ ശസ്ത്രക്രിയകൾ. പ്രതിഫലമായി 50 കരൾമാറ്റ ശസ്ത്രക്രിയകൾ നടത്തണമെന്നാണ് ആശുപത്രിയോട് താരം ആവശ്യപ്പെട്ടത്.
ദ മാൻ മാസികയ്ക്ക് നൽകിയ അഭിമുഖത്തിലാണ് സോനു സൂദിന്റെ വെളിപ്പെടുത്തൽ. ഇത്രയും ആളുകൾക്ക് ശസ്ത്രക്രിയ നടത്തണമെങ്കിൽ 12 കോടിയോളം രൂപവേണ്ടിവരുമെന്നും അദ്ദേഹം പറഞ്ഞു.
ദുബായിലേക്കുള്ള ഒരു യാത്രയ്ക്കിടെയാണ് ഒരാൾ ബന്ധപ്പെടുന്നത്. താനുമായി സഹകരിച്ച് പ്രവർത്തിക്കാൻ താൽപര്യമുണ്ടെന്ന് അവർ പറഞ്ഞു. താൻ അവരെ പ്രമോട്ട് ചെയ്യാമെന്നും പകരമായി അൻപത് രോഗികളുടെ കരൾമാറ്റ ശസ്ത്രക്രിയ നടത്തണമെന്നും തിരിച്ച് ആവശ്യപ്പെട്ടു. ഇതിനായി 12 കോടിയോളം രൂപ ചെലവുവരും. ഇപ്പോൾ ശസ്ത്രക്രിയ നടന്നുകൊണ്ടിരിക്കുകയാണ്. ചികിത്സചെലവുകൾക്ക് സാമ്പത്തിക സ്ഥിതിയില്ലാത്തവർക്കാണ് ശസ്ത്രക്രിയ നടത്തിക്കൊടുക്കുന്നത്’- സോനു സൂദ് പറഞ്ഞു.
കോവിഡ് കാലത്തടക്കം സോനു സൂദ് നടത്തിയ ദുരിതാശ്വാസ പ്രവർത്തനങ്ങൾ സോഷ്യൽമീഡിയയുടെ മനം കവർന്നിരുന്നു.