മലയാളത്തിലൂടെ സിനിമയിലേക്ക് അരങ്ങേറി തെന്നിന്ത്യയിൽ സ്വന്തമായി അഭിനയത്തിന്റെ വ്യക്തിമുദ്ര പതിപ്പിച്ച നടൻ ഹരീഷ് പേരടി തെലുങ്ക് ചിത്രത്തിൽ മുഖ്യവേഷത്തിലെത്തുന്നു. സ്വരൂപ് ആർഎസ്‌ജെ സംവിധാനം ചെയ്യുന്ന മിഷൻ ഇംപോസിബിൾ എന്ന ചിത്രത്തിലൂടെയാണ് താരം മുൻനിരയിലേക്ക് എത്തിയിരിക്കുന്നത്. ചിത്രത്തിലെ താരത്തിന്റെ ക്യാരക്കറ്റർ പോസ്റ്റർ പുറത്തുവന്നു. ഹരീഷ് തന്നെയാണ് പോസ്റ്റർ പങ്കുവെച്ചത്. തനിക്ക് തമിഴിൽ മാത്രമല്ല, തെലുങ്കിലും അവസരം ലഭിക്കുന്നുണ്ട്. അതിന് കാരണം അക്ഷരം പഠിപ്പിച്ച മലയാളമാണെന്നാണ് ഹരീഷ് ഫേസ്ബുക്കിൽ പോസ്റ്റർ പങ്കുവെച്ചുകൊണ്ട് കുറിച്ചത്.
‘പ്രിയപ്പെട്ട അമ്മ മലയാളമേ ഒരു പാട് നന്ദി. തമിഴ് മാത്രമല്ല തെലുങ്ക് സിനിമാലോകവും എന്നെ വല്ലാതെ സ്‌നേഹിക്കുന്നുണ്ട്. എല്ലാത്തിനുകാരണം അക്ഷരം പഠിപ്പിച്ച അമ്മയാണ്. മലയാളമാണ്.’ – ഹരീഷ് കുറിച്ചു.
ബോളിവുഡ് താരം തപ്‌സി പന്നു തെലുങ്കിലേക്ക് തിരിച്ച് വരവ് നടത്തുന്ന ചിത്രം കൂടിയാണിത്. ‘തെലുങ്കു സിനിമ ഇൻഡസ്ട്രി എന്നെ തപ്‌സി പന്നുവിനും സംവിധായകൻ സ്വരൂപ് ആർഎസ്‌ജെക്കും ഒപ്പം അറസ്റ്റ് ചെയ്തു’-എന്നാണ് ഇക്കാര്യത്തെ കുറിച്ച് ഹരീഷ് ഫേസ്ബുക്കിൽ കുറിച്ചത്. ഏജന്റ് സായ് ശ്രീനിവാസ അത്രേയ എന്ന സിനിമയിലൂടെ ശ്രദ്ധേയനാണ് സംവിധായകൻ സ്വരൂപ് ആർഎസ്‌ജെ. മാറ്റ്‌നി എന്റർടെയ്ൻമെന്റ് ആണ് ചിത്രം നിർമിക്കുന്നത്.
