നീണ്ടകാലത്തെ ഇടവേളയ്ക്ക് ശേഷം അഭിനയ രംഗത്തേക്കുള്ള മടങ്ങിവരവ് പ്രഖ്യാപിച്ച് നടി തനുശ്രീ ദത്ത. ഇന്‍സ്റ്റഗ്രാമിലൂടെയാണ് താരം തന്റെ മടങ്ങി വരവ് അറിയിച്ചത്. യുഎസ് സര്‍ക്കാരിന്റെ ജോലി വേണ്ടെന്നുവച്ചാണ് താന്‍ മടങ്ങിയെത്തുന്നതെന്ന് തനുശ്രീ തന്റെ പോസ്റ്റില്‍ കുറിക്കുന്നു.
നാന പടേകര്‍ക്കെതിരെ ശക്തമായ മീ ടൂ ആരോപണവുമായി രംഗത്തെത്തിയ ആളാണ് തനുശ്രീ. പിന്നീട് ബോളിവുഡില്‍ നിന്ന് ഇടവേളയെടുത്ത് അമേരിക്കയിലേക്ക് പോകുകയായിരുന്നു. ചില മോശം ആളുകളും അവരുണ്ടാക്കിയ കുരുക്കുകളുമാണ് തന്റെ വഴിയില്‍ തടസ്സമുണ്ടാക്കിയതെന്ന് പറഞ്ഞ നടി അഭിനയ ജീവിതത്തിന് മറ്റൊരു അവസരം കൂടി നല്‍കാനുള്ള ഒരുക്കത്തിലാണെന്നും കൂട്ടിച്ചേര്‍ത്തു.
ബോളിവുഡിലും മുംബൈയിലും എനിക്ക് നല്ല പേരാണ് ഉള്ളത്. അതികൊണ്ടാണ് ഇന്ത്യയിലേക്ക് മടങ്ങിയത്. കുറച്ചുകാലം ഇവിടെ താമസിക്കുകയും രസകരമായ ചില പ്രോജക്ടുകളില്‍ പ്രവര്‍ത്തിക്കുകയും ചെയ്യുമെന്ന് തനുശ്രീ കുറിച്ചു. സിനിമകളിലും വെബ് സീരീസുകളിലുമായി നിരവധി ഓഫറുകള്‍ ലഭിക്കുന്നുണ്ട്. ബോളിവുഡിലെ ചില പ്രമുഖ വ്യക്തികള്‍ പിന്തുണയ്ക്കുന്നുണ്ടെന്നും നടി കൂട്ടിച്ചേര്‍ത്തു.
കൊവിഡ് കാരണം ഷൂട്ടുകള്‍ വൈകുന്നതിനാലാണ് പ്രോജക്ടുകളെ പറ്റി ഔദ്യോഗികമായി പുറത്തുവിടാത്തത്. സിനിമയിലേക്കുള്ള മടങ്ങി വരവ് വളരെ ആകാംഷയോടെയാണ് താന്‍ കാണുന്നതെന്നും അതിനായി ശരീരഭാരം 15 കിലോയോളം കുറച്ചുവെന്നും താരം അറിയിച്ചു.