സോഷ്യൽമീഡിയയിൽ ഈ ലോക്ക് ഡൗൺ കാലത്ത് ഏറെ പ്രചരിച്ചതും അമ്പരപ്പിച്ചതുമായ സന്ദേശമാണ്- ”ലോക്ക്ഡൗൺ കാലത്ത് ഭക്ഷണം പോലുമില്ലാതെ വിഷമിക്കുന്ന പാവങ്ങൾക്ക് ആമീർ ഖാൻ ഒരു കിലോ വീതം ആട്ട നൽകി. ഒരു കിലോ ആട്ടയല്ലേ, അതുവാങ്ങാൻ എത്തിയത് അത്യാവശ്യക്കാരായ പാവങ്ങൾ മാത്രം. വീട്ടിലെത്തി കവർ തുറന്നപ്പോൾ അതിൽ 15,000 രൂപ..”.- എന്ന ഈ ചെറിയ വാക്കുകൾ.
സംഭവം അധികം വലിയ സന്ദേശം അല്ലെങ്കിലും ഈ പറഞ്ഞ സംഭവം സോഷ്യൽമീഡിയ അങ്ങ് ഏറ്റെടുത്തു. വ്യാപകമായി പ്രചരിക്കാനും ആരംഭിച്ചു. ആമീർ ഖാനെ അഭിനന്ദിച്ചും പ്രശംസിച്ചും ഒട്ടനവധിപേർ രംഗത്തെത്തി. ആദ്യം സത്യമെന്ന് വിശ്വിച്ച് മിണ്ടാതിരുന്നവർ പിന്നീട് ആമിർ ഖാനോട് തന്നെ നിജസ്ഥിതി ആരാഞ്ഞു. പിന്നാലെ ഇത് സത്യമല്ലെന്നുള്ള വാദങ്ങളും ഉയർന്നു.
ഒടുവിൽ, ഇപ്പോഴിതാ താനങ്ങനെ ചെയ്തിട്ടില്ലെന്ന് വ്യക്തമാക്കി രംഗത്ത് എത്തിയിരഇിക്കുകയാണ് സാക്ഷാൽ ആമിർ ഖാൻ. ‘സുഹൃത്തുക്കളെ, ഗോതമ്പ് ചാക്കിൽ പൈസ വച്ച വ്യക്തി ഞാനല്ല. ഒന്നുകിൽ അത് പൂർണ്ണഇമായും വ്യാജ വാർത്തയായിരിക്കും, അല്ലെങ്കിൽ റോബിൻ ഹുഡ് സ്വയം വെളിപ്പെടുത്താൻ ആഗ്രഹിക്കുന്നില്ല. സുരക്ഷിതരായിരിക്കൂ.’..ആമിർ ഫേസ്ബുക്കിൽ കുറിച്ചതിതാണ്.
ആമിർ ആട്ടയിൽ ഒളിപ്പിച്ച് 15,000 രൂപ വിതരണം ചെയ്തിട്ടില്ലെന്ന് പ്രമുഖ ഫാക്ട് ചെക്കിംഗ് വെബ്‌സൈറ്റായ ബൂം ലൈവ് നേരത്തെ റിപ്പോർട്ട് ചെയ്തിരുന്നു. സമാൻ എന്ന യുവാവാണ് ടിക് ടോകിൽ ഇത്തരത്തിലുള്ള ഒരു പ്രചരണത്തിന് തുടക്കമിട്ടത്. ഗോതമ്പ് പൊടിയിൽ നിന്ന് പണമെടുക്കുന്നതിന്റെ വീഡിയോയും ഇയാൾ പങ്കുവച്ചു. തുടർന്ന് അത് വ്യാപകമായി ഷെയർ ചെയ്യപ്പെടുകയായിരുന്നു.
