ജപ്പാന്‍: ഗൂഗിള്‍ എര്‍ത്തില്‍ മാതാപിതാക്കളുടെ വീട് തിരഞ്ഞ യുവാവിന് ലഭിച്ചത് വര്‍ഷങ്ങള്‍ക്ക് മുമ്പ് മരണപ്പെട്ട അച്ഛന്റെ ചിത്രം. ഏഴ് കൊല്ലങ്ങള്‍ക്ക് മുമ്പ് മരിച്ചു പോയ അച്ഛന്റെ റോഡരികില്‍ നില്‍ക്കുന്ന ഫോട്ടോയാണ് ഗൂഗിള്‍ എര്‍ത്ത് നല്‍കി ഞെട്ടിച്ചിരിക്കുന്നത്.
ജപ്പാന്‍ സ്വദേശിയായ ടീച്ചര്‍ യുഫോയ്ക്കാണ് ഗൂഗിള്‍ എര്‍ത്ത് ഞെട്ടിക്കുന്ന സമ്മാനം നല്‍കിയത്. യൂഫോ ട്വിറ്ററില്‍ ഗൂഗിള്‍ എര്‍ത്തില്‍ നിന്ന് ലഭിച്ച ഫോട്ടോയുള്‍പ്പെടെയാണ് ഈ വിവരം ഷെയര്‍ ചെയ്തത്. റോഡരികില്‍ ആരെയോ കാത്തെന്ന പോലെയാണ് യുവാവിന്റെ അച്ഛന്‍ നില്‍ക്കുന്നത്. തീര്‍ച്ചയായും അത് അമ്മയെ കാത്തുള്ള നില്‍പാണെന്ന് ഇയാള്‍ പറയുന്നു. വളരെ ശാന്തനായ, ദയാലുവായ വ്യക്തിയായിരുന്നു തന്റെ പിതാവെന്നും ഇയാള്‍ പങ്കുവയ്ക്കുന്നു.
‘ഏഴ് വര്‍ഷം മുമ്പ് മരിച്ചു പോയ അച്ഛനെ ഞാന്‍ കണ്ടു’ എന്ന് കുറിച്ചാണ് യുവാവ് ഫോട്ടോ ഷെയര്‍ ചെയ്തത്. ജനുവരി നാലിന് പങ്കുവെച്ച ഗൂഗിള്‍ ക്യാമറ പകര്‍ത്തിയ ചിത്രങ്ങള്‍ ഉള്‍പ്പെട്ട ട്വീറ്റ് ഇതിനോടകം 69 ലക്ഷത്തിലധികം പേരാണ് ലൈക്ക് ചെയ്തത്. പതിനൊന്ന് ലക്ഷത്തിലധികം പേര്‍ പോസ്റ്റ് റീട്വീറ്റ് ചെയ്തു.
വീടും പ്രദേശവും തെരുവുമൊക്കെ തിരയാന്‍ സാധാരണയായി ആശ്രയിക്കുന്ന സംവിധാനമാണ് ഗൂഗിള്‍ എര്‍ത്ത്. തെരുവുകളുടെ ചിത്രങ്ങളില്‍ ചിലപ്പോഴൊക്കെ ആളുകളും പതിയാറുണ്ട്. അത്തരത്തിലാവും ഈ യുവാവിന്റെ അച്ഛന്റെ ചിത്രവും സംരക്ഷിക്കപ്പെട്ടത്. ഗൂഗിളിനോട് തന്റെ പ്രദേശത്തിന്റെ ഫോട്ടോ അപ്ഡേറ്റ് ചെയ്യരുതെന്ന് അഭ്യര്‍ഥിച്ചിരിക്കുകയാണ് യുവാവ്.
コロナでやる事ないからGoogleEarthで実家見に行ったら7年前に死んだ親父が写ってた。その先に人が居たから見に行ったら母ちゃんだった。一服しながら奥さんの帰りを待ってたんだな。無口だけど優しい親父だった。このままこの場所の写真更新しないで欲しいな。 pic.twitter.com/PXxBICAxmz
— タムチンキ (@TeacherUfo) January 4, 2021
