അപ്പൂപ്പനും അമ്മൂമ്മയും തിരക്കിലാണ്..! ബാഡ്മിന്റണ്‍ കോര്‍ട്ടില്‍ കുട്ടികളെ അമ്പരപ്പിച്ച് താരങ്ങള്‍

തെലങ്കാന: കുട്ടികള്‍ക്ക് കൂട്ടായി ബാഡ്മിന്റണ്‍ അക്കാദമിയിലേക്ക് ഒരപ്പൂപ്പനും അമ്മൂമ്മയുമെത്തി. എന്താ ഇവിടെ കാര്യം കളികാണാന്‍ എത്തിയതാണോ കുട്ടികളുടെ ചോദ്യത്തിന് പരസ്പരം ചിരിച്ചുകൊണ്ട് ഇരുവരും മറുപടി നല്‍കി. കാണാനല്ല മക്കളെ കളിക്കാന്‍ വന്നതാ. സെകന്തരാബാദിലെ ഗരുഡയിലെ അക്കാദമിയിലാണ് അവരെത്തിയത്.

എന്നാല്‍ മുത്തച്ഛന്റേയും മുത്തശ്ശിയുടേയും കളികാണാന്‍ കുട്ടികള്‍ വളരെ രസത്തോടെ ഇരുന്നെങ്കിലും ബാറ്റ് കൈയ്യിലെടുത്ത ഇരുവരും കളിക്കാന്‍ കഷ്ടപ്പെടുന്നതുകൂടി കണ്ടതോടെ കുട്ടികള്‍ അക്ഷമരായി. ഇവര്‍ ഇത് എന്താണ് കാണിക്കുന്നത് എന്ന ഭാവമായിരുന്നു അവരുടെ മുഖത്ത്.

എന്നാല്‍ അക്ഷമരായി പരസ്പരം പിറുപിറുത്ത് കുട്ടികള്‍ ക്ഷുപിതരാകാന്‍ തുടങ്ങിയതോടെ കളിക്കാര്‍ ഞെട്ടിച്ചു. അമ്മൂമ്മയുടെ വക ഉഗ്രനൊരു ഷോട്ട്. കുട്ടികളുടെ കണ്ണുതള്ളി. പിന്നീട് കൈയടിച്ചു. തൊട്ടുപിന്നാലെ അപ്പൂപ്പനും കളി തുടങ്ങി.

പരിശീലനത്തെത്തിയ കുട്ടികള്‍ അവര്‍ക്ക് മുന്നില്‍ നിഷ്പ്രഭരായി. അപ്പോഴല്ലേ രസം വാതുറന്നു നിന്ന കുട്ടികളുടെ മുന്നില്‍ പെട്ടെന്ന് അപ്പൂപ്പനും അമ്മൂമ്മയും ആ രഹസ്യം വെളിപ്പെടുത്തി. മുഖത്തൊട്ടിച്ച മാസ്‌ക് അഴിച്ചതോടെ കുട്ടികള്‍ ആര്‍ത്തുവിളിച്ചു.

ഇന്ത്യന്‍ ബാഡ്മിന്റണ്‍ താരങ്ങളായ അശ്വിനി പൊന്നപ്പയും കിഡംബി ശ്രീകാന്തുമായിരുന്നു ആ മാസ്‌കിന് പിന്നില്‍ എന്ന് കുട്ടികള്‍ ഒരിക്കലും ചിന്തിച്ചിരുന്നില്ല.