ദുബായ്: കുടുംബത്തോടൊപ്പം ചെറിയ പെരുന്നാള്‍ ആഘോഷിച്ച് യുഎഇ പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം.
കുടുംബത്തിലെ കൊച്ചു കുട്ടികള്‍ക്കൊപ്പം ഷെയ്ഖ് മുഹമ്മദ് സമയം ചെലവിടുന്ന ചിത്രം അദ്ദേഹത്തിന്റെ മകനും ദുബായ് കിരീടാവകാശിയും ദുബായ് എക്‌സിക്യുട്ടീവ് കൗണ്‍സില്‍ ചെയര്‍മാനുമായ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂമാണ് പുറത്തുവിട്ടത്.
ഇന്‍സ്റ്റഗ്രാമില്‍ പോസ്റ്റ് ചെയ്ത ചിത്രം ഇതിനോടകം വലിയ ശ്രദ്ധനേടി. നിരവധിയാളുകളാണ് ഇതിന് കമന്റുമായി എത്തിയത്. കുടുംബമാണ് ഏറ്റവും വലുത്, മനോഹരമായ കുടുംബം ദൈവം അനുഗ്രഹിക്കട്ടേ, പെരുന്നാള്‍ ആശംസകള്‍ എന്നു തുടങ്ങി നിരവധി കമന്റുകളാണ് ഷെയ്ഖ് ഹംദാന്‍ പോസ്റ്റ് ചെയ്ത ചിത്രത്തിനു താഴെ ലഭിക്കുന്നത്.
ചെറിയ പെരുന്നാള്‍ ദിവസമായ ഇന്ന് ഷെയ്ഖ് മുഹമ്മദ് രാവിലെ സബീല്‍ പള്ളില്‍ എത്തിയാണ് പെരുന്നാള്‍ നമസ്‌കാരത്തില്‍ പങ്കെടുത്തത്. പുത്രന്മാരായ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം, ദുബായ് ഉപഭരണാധികാരി ഷെയ്ഖ് മക്തൂം ബിന്‍ മുഹമ്മദ് ബിന്‍ റാഷിദ് അല്‍ മക്തൂം, നോളജ് ഫൗണ്ടേഷന്‍ ചെയര്‍മാന്‍ ഷെയ്ഖ് അഹമദ് ബിന്‍ മുഹമ്മദ് ബിന്‍ റാഷിദ് അല്‍ മക്തൂം എന്നിവര്‍ക്കൊപ്പമാണ് അദ്ദേഹം എത്തിയത്.
യുഎഇയിലെയും മുസ്‌ലിം, അറബ് ലോകത്തെ എല്ലാവര്‍ക്കും ഷെയ്ഖ് മുഹമ്മദ് പെരുന്നാള്‍ ആശംസകള്‍ നേര്‍ന്നു. സമാധാനത്തോടെയും എല്ലാ അനുഗ്രഹങ്ങളും ഉള്ള ഈദ് ആഘോഷമാവട്ടെയെന്നും അദ്ദേഹം ആശംസിച്ചു.