കൊവിഡിനെ തടയാന്‍ ബാസിലസ് കാല്‍മെറ്റ്-ഗുറിന്‍ (ബിസിജി) വാക്‌സിന്‍ ഫലപ്രദമെന്ന് പഠനറിപ്പോര്‍ട്ട്. കൊറോണ വൈറസിനെ നേരിടുന്നതില്‍ ഇന്ത്യ പോലുള്ള രാജ്യങ്ങള്‍ ചില പ്രധാന രാജ്യങ്ങളെക്കാള്‍ മികച്ച പ്രകടനം കാഴ്ചവയ്ക്കുന്നത് ബിസിജി വാക്‌സിന്‍ കാരണമാണെന്നും പഠനം പറയുന്നു.
കുട്ടിക്കാലത്തെ ക്ഷയരോഗം തടയുന്നതിനായി കുത്തിവെക്കുന്ന വാക്‌സിനാണ് ബാസിലസ് കാല്‍മെറ്റ്-ഗുറിന്‍ (ബിസിജി). നിര്‍ബന്ധിതമായി പ്രതിരോധ കുത്തിവയ്പ് നല്‍കിയ രാജ്യങ്ങളില്‍ കോവിഡ് -19 അണുബാധയും പൊട്ടിപ്പുറപ്പെട്ട ആദ്യ മാസത്തില്‍ മരണങ്ങളും കുറവായിരുന്നു എന്നാണ് കണ്ടെത്തല്‍.
വ്യാപിച്ചുകൊണ്ടിരിക്കുന്ന കൊവിഡിനെ നേരിടാന്‍ ബിസിജി വാക്‌സിനുകള്‍ ഫലപ്രദമാണെന്ന് നേരത്തെയും റിപ്പോര്‍ട്ട് വന്നിരുന്നു. 130 രാജ്യങ്ങളില്‍ നിന്നുള്ള കോവിഡ്-19 അണുബാധയും മരണസംഖ്യയും അവലോകനം ചെയ്ത പഠനം കാണിക്കുന്നത് 2000 ന് ശേഷം ബിസിജി രോഗപ്രതിരോധത്തില്‍ പിന്നോട്ട് പോയ പ്രദേശങ്ങളിലെ മരണങ്ങളില്‍ ഗണ്യമായ വര്‍ധനവ് രേഖപ്പെടുത്തിയെന്നാണ്.
അമേരിക്കന്‍ അസോസിയേഷന്‍ ഫോര്‍ ദി അഡ്വാന്‍സ്‌മെന്റ് ഓഫ് സയന്‍സ് ജേണലിലാണ് ഈ പഠന റിപ്പോര്‍ട്ട് പ്രസിദ്ധീകരിച്ചിരിക്കുന്നത്. ബിസിജി വാക്‌സിന്‍ നേരത്തെ തന്നെ നിര്‍ബന്ധമായും നടപ്പിലാക്കിയിരുന്നെങ്കില് യുഎസിലെ മരണനിരക്ക് കുറയ്ക്കാന്‍ കഴിഞ്ഞേനെ എന്നും പഠന റിപ്പോര്‍ട്ടില്‍ സൂചിപ്പിക്കുന്നുണ്ട്.
കോവിഡ് -19 നെതിരായ പോരാട്ടത്തില്‍ നിര്‍ബന്ധിത ബിസിജി വാക്‌സിനേഷന്‍ ഫലപ്രദമാകുമെന്ന് ഞങ്ങളുടെ വിശകലനം സൂചിപ്പിക്കുന്നുവെന്ന് അമേരിക്കന്‍ അസോസിയേഷന്‍ ഫോര്‍ ദി അഡ്വാന്‍സ്‌മെന്റ് ഓഫ് സയന്‍സ് (എഎഎഎസ്) ജേണലില്‍ ജൂലൈ 31 ന് പ്രസിദ്ധീകരിച്ച പഠനത്തില്‍ മിഷിഗണ്‍ സര്‍വകലാശാലയിലെ ഗവേഷകര്‍ പറഞ്ഞു.