സുല്‍ത്താന്‍ ബത്തേരി: വയനാട്ടില്‍ വനത്തില്‍ തീപിടുത്തം. സുല്‍ത്താന്‍ ബത്തേരി മൂലങ്കാവ് കാരശ്ശേരി വനത്തിലാണ് തീപിടുത്തമുണ്ടായത്. ഫയര്‍ഫോഴ്‌സും നാട്ടുകാരും വനവകുപ്പ് ഉദ്യോഗസ്ഥരും ചേര്‍ന്ന് തീയണക്കാനുള്ള ശ്രമത്തിലാണ്.
വനത്തിനുള്ളില്‍ ജനവാസ മേഖലയോട് അടുത്തുകിടക്കുന്ന മുളങ്കാടുകള്‍ക്കാണ് തീ പിടിച്ചിരിക്കുന്നത്. തീ സമീപത്തെ റബര്‍ തോട്ടത്തിലേക്കും പടന്നുകയറിയിട്ടുണ്ടെന്നാണ് വിവരം.
വിവരമറിഞ്ഞ് ബത്തേരിയില്‍ നിന്ന് രണ്ട് യൂണിറ്റ് ഫയര്‍ഫോഴ്‌സാണ് സ്ഥലത്തെത്തിയത്. ഇവര്‍ക്കൊപ്പം നാട്ടുകാരും വനവകുപ്പ് ഉദ്യോഗസ്ഥരും തീ പൂര്‍ണ്ണമായും അണക്കാനുള്ള തീവ്രശ്രമത്തിലാണ്.
ഈ മേഖലയില്‍ മുന്‍പും സമാന രീതിയില്‍ മുളംകൂട്ടങ്ങള്‍ക്ക് തീ പിടിച്ചിരുന്നു. ഈ വനത്തില്‍ ആനകളുണ്ടായിരുന്നുവെന്നാണ് പ്രദേശവാസികള്‍ പറയുന്നത്.
